21 аймаг, есөн дүүргийн салбар зөвлөлийн салбар хороо, гэр бүл хүүхэд залуучуудын хөгжлийн газрын орон нутгийн салбар нэгжийн төлөөлөл болон зочдын 100 гаруй мэргэжилтэн “Ураг удам уламжлалын холбоо”-ны анхдугаар зөвөлгөөнд оролцлоо.

Тус зөвөлгөөн нь Монголын хүүхдийн ордны бага танхимд болсон юм. Энэхүү холбоог Ж.Түвдэндорж байгуулсан бөгөөд зөвөлгөөний дараа ярилцсан юм.

-Та холбоогоо хэзээ байгуулсан бэ?

-2012 оны аравдугаар сард би Монгол түмэндээ болон малчиддаа хандсан хоёр нийтлэл бичиж ТББ-уудад хүргүүлсэн юм. Үүний хариу арванхоёрдугаар сарын долоонд хариу ирж, уг санаагаа олон нийтэд хүргэх нь зөв юм байна гэсэн саналыг тавьснаар дээрх холбоог байгуулсан.

-Одоогоор ямар үйл ажиллагаа зохион байгуулаад байна вэ?

-Монголын ураг удам, уламжлал анагаах ухаан өнөөгийн түвшин, ургийн бичиг хөтлөх аргачлал, ураг удам цахим программ, ястан угсаатны тухай, нэгдсэн Монгол Улсын түүх, ураг удмыг террорист замаас хамгаалах нь, ураг удмын овоо тахилгын учир, хонины цагаан далаар есөн үеийг мэдэх тайлал, Монголын ураг удмын нууц, Монголын ураг, удмын талаар хэвлэл мэдээллээр суртачлан таниулах нь, эерэг сэтгэлгээний давалгаа, туршлага солилцох үйл ажиллагаа аймаг орон нутгийн салбарууд үйл ажиллагаа, туршлагаа танилцуулах, Монголын ураг удам уламжлал үндэсний аюулгүй байдалд яаж нөлөөлж байна вэ зэрэг сэдийн хүрээнд сургалт судалгаа хийсэн.

-Танай холбоо гишүүнчлэлтэй юу?

-Байхгүй. Зөвхөн нийгмийн төлөө үйл ажиллагаа явуулдаг байгууллага. 21 аймагт салбартай болсон. Ураг удмын бичигээ хөтөлдөг, хөтлөх сонирхолтой, нийгмийн төлөө зүрх сэтгэлтэй хувь хүн, эрдэмтэн судлаачидтай хамтардаг.

-Холбооны тань үйл ажиллагааны зорилго юу вэ?

-Ураг удмаа мэдхийг хүссэн буюу угийн бичгээ хөтлөх хүмүүст заавар зөвлөгөө өгөх, цус ойртолтоос сэргийлж Монгол удмын санг хадгалж үлдхэд гол зорилго оршиж байгаа.

-Угийн бичигт бусдын мэдээллийг багтаахдаа голчлон ямар мэдээллийг нь оруулдаг вэ?

-Хамгийн гол нь тэр хүнийхээ талаарх мэдээллийг сайтар судалгаа хийх хэрэгтэй. Архиваас судлах, өвөг дээдэс, нутаг усныхнаасаа асууж сураглах зэрэг олон судалгааны хэлбэр бий. Судалгаагаа нягталж шалгаж байж угийн бичигтээ мэдээлэлээ оруулдаг.

-Байгууллагынхаа цаашдын үйл ажиллагааг сонирхуулна уу?

-Цаашдаа 21 аймаг дахь салбараараа дамжуулж угийн бичиг хөтөлдөг хүнийг олшруулах, угийн бичиг хөтөлснөөр ямар үр ашигтай вэ гэдгийг олон нийтэд сурталчлан таниулахад ойрын зорилгоо болгоод байгаа.

Л.Сайнбаяр