Дөрвөн жил тутамд хуралддаг Монголын үндэсний олимпийн хорооны чуулган энэ сарын 24-нд болно. Зуны олимпийн наадам зохион байгуулагдсаны дараа жилийн эхний улиралд багтаан хуралдуулах дүрмийн дагуу уг чуулганыг товлосон хугацаанд зохион байгуулж, МҮОХ-ны ерөнхийлөгч, дэд ерөнхийлөгч, гүйцэтгэх зөвлөлийн гишүүдийг сонгох юм.

Энэ удаагийн олимпийн чуулганд 167 гишүүн оролцох бөгөөд тэд МҮОХ-ны гишүүн байгууллага, холбоод, олимпийн зөвлөл, тамирчид байх ёстой. Тодруулбал энэ удаагийн МҮОХ-ны чуулганд дараах байдлаар төлөөлөгчид сонгогджээ.

• Олимпийн төрлийн спорт холбоод - 32 /Тус бүр 3 төлөөлөгч/
• Олимпийн бус төрлийн спорт холбоод – 36
• Олимпийн зөвлөл - 29
• ОУОХ-ны гишүүн - 1
• Тамирчдын төлөөлөл – 2 /Олимпийн аварга/

МҮОХ-ны чуулганаар дараах асуудлыг хэлэлцэх дүрэмтэй.

• Мандатын комиссын илтгэл: Мандатын комиссын илтгэлийг хэлэлцэн баталснаар МҮОХ-ны Чуулганы төлөөлөгчид МҮОХ-ны гишүүнээр тооцогдож, бүрэн эрх нь нээгдэнэ. Гишүүний эрх дараагийн чуулган хүртэл хадгалагдана.
• МҮОХ-ны сонгуульт хугацааны тайлан.
• МҮОХ-ны Хянан шалгах зөвлөлийн сонгуульт хугацааны тайлан.
• МҮОХ-ны ерөнхийлөгч, дэд ерөнхийлөгч болон Гүйцэтгэх зөвлөлийн гишүүдийн сонгууль.
• Хянан шалгах зөвлөлийн гишүүдийн сонгууль.

МҮОХ-ны ерөнхийлөгчид өрсөлдөхөөр дараах хүн нэр дэвшжээ.

1. Я.Батсуурь /Шагайн харвааны холбооны ерөнхийлөгч/
2. Ц.Бат-Энх /Волейболын холбооны ерөнхий нарийн бичгийн дарга/
3. Ч.Бат-Эрдэнэ /Даамын холбооны ерөнхий нарийн бичгийн дарга/
4. Д.Загдсүрэн /Одоогийн ерөнхийлөгч/
5. Ч.Зоригтбаатар /Хөнгөн атлетикийн холбооны ерөнхий нарийн бичгийн дарга/
6. Э.Мөнх-Очир /Биатлоны холбооны ерөнхийлөгч/
7. Л.Халтар /Гимнастикийн холбооны хүндэт ерөнхийлөгч/

МҮОХ нь дүрмэндээ хоёр дэд ерөнхийлөгчтэй байхаар заасан ба дараах нэр дэвшигчдээс хоёр нь сонгогдож, тэргүүн дэд, дэд ерөнхийлөгч болно.

1. Х.Баттулга /Жүдо бөхийн холбооны ерөнхийлөгч/
2. Б.Баттүшиг /Бадминтоны сонирхогчдын холбооны ерөнхийлөгч/
3. Ц.Дамдин /МҮОХ-ны дэд ерөнхийлөгч/
4. Ч.Зоригтбаатар /Хөнгөн атлетикийн холбооны ерөнхий нарийн бичгийн дарга/
5. Ч.Отгонбаатар /Орчин үеийн таван төрөлтийн холбооны ерөнхийлөгч/
6. Ж.Хатанбаатар /МҮОХ-ны дэд ерөнхийлөгч/

МҮОХ-ны гүйцэтгэх зөвлөл нь 11 хүний бүрэлдэхүүнтэй байна. Үүнд МҮОХ-ны ерөнхийлөгч, тэргүүн дэд ерөнхийлөгч, дэд ерөнхийлөгч, ОУОХ-ны гишүүн Ш.Магван, сүүлийн хоёр олимпийн наадамд оролцсон нэг тамирчин, бусад зургаан сонгогдсон төлөөлөгч багтана.