“Боловсрол” суваг телевиз “Эндемол шайн”  группийн албан ёсны эрхтэйгээр “Яг түүн шиг” шоуг өнгөрсөн жил Монголд анх удаа зохион байгуулсан. Тус нэвтрүүлгийн хоёрдугаар улирлын дугаар өчигдөр дээрх телевизийн эфирээр цацагдаж эхлэв.

“Яг түүн шиг-2” шоуны эхний өдрийн дугаарын ялагчаар “Х түц” продакшны жүжигчин, Т.Бархүү шалгарч гурван сая төгрөгийн эзэн боллоо. Тэрбээр эхний дугаарт дуучин Т.Дэлгэрмөрөнгийн дүрд хувирч, “Наян булаг” дууг дуулсан юм.

Т.Дэлгэрмөрөн өөрийн цахим хуудаснаа "Найздаа маш их амжилтыг хүсье. Өөрийнхөө дээл, бүсийг өгсөн минь үнэхээр оножээ. Бас гайхалтай хоолой нь үнэхээр яг л би юм шиг санагдлаа" хэмээжээ.

Түүнчлэн “Яг түүн шиг” шоу эхлэхээс өмнө нэвтрүүлэгт оролцох долоон оролцогчыг албан ёсоор танилцуулсан хэдий ч найм дахийг нь нууцлаад байсан. Энэ оролцогч “Шар айраг” хамтлагийн ахлагч Г.Ганхүү байлаа.

Тэрбээр өнгөрсөн жилийн “Яг түүн шиг” шоунд шүүгчээр ажилласан бол энэ удаад 60-70-аад оныхныг төлөөлөн залуучуудтай өрсөлдөхөөр зориг шулуудсан нь энэ байв.  

Мөн шоуны шүүгчдийн бүрэлдэхүүнд өөрчлөлт орж, “Х түц” продакшны жүжигчин Н.Онон, жүжигчин Г.Ундармаа, урлаг судлаач, продюссер Б.Наранзун нар багтжээ.