Мэдэгдлийн агуулга нь үүрэг хариуцлагаа ухамсарлан, Банк бус санхүүгийн үйл ажиллагааны тухай хууль, “Банк бус санхүүгийн үйл ажиллагааны зохицуулалтын журам”-д заасан шаардлагыг бүрэн хангаж, чанд мөрдөн ажиллах, тухайлбал харилцагчид гадаад валютыг худалдан авах, худалдах тухай бүр арилжааны баримтыг заавал үйлдэн нэг хувийг харилцагчид өгч, нөгөө хувийг санхүүгийн баримт болгон хадгалах, Хороонд бүртгүүлсэн орон тооны ажилтнуудаасаа гадна тусгай зөвшөөрөлгүй валютын арилжаа эрхэлж байгаа иргэдийг ажиллуулахгүй байх, тэдгээр иргэдийн хууль бус үйлдлийг өөгшүүлэн ажлын байраа түрээслүүлэхгүй байхыг мэдэгджээ.

Түүнчлэн Валютын зохицуулалтын тухай хуулийн 5.6 /валютын арилжаа хийх тусгай зөвшөөрөлтэй банк бус санхүүгийн байгууллага нь валютын захын эрэлт хэрэгцээнд үндэслэн бэлэн валют худалдах, худалдан авах өөрийн ханшийг тогтооно/-д заасанчлан валютын ханшаа тогтоохдоо зах зээлийн бодит эрэлт, нийлүүлэлт дээр үндэслэх, ханшийг хэт хөөрөгдөхгүй байхыг мөн анхааруулсан байна.

Хэрэв ямар нэгэн байдлаар дээр дурдагдсан агуулгын зөрчил дутагдал илэрч, хууль, журам зөрчсөн нь тогтоогдвол тусгай зөвшөөрлийг хүчингүй болгох хүртэл арга хэмжээ авах болсныг Санхүүгийн зохицуулах хорооноос онцгой анхааруулжээ.