Найз охиноо хэрцгийгээр зодож амь насыг нь хөнөөсөн гэх 33 настай Г.Алтанхүүд холбогдох хэргийг УМБГ-ын Онц хүнд гэмт хэрэгтэй тэмцэх хэлтэст шилжүүлэн шалгаж байгаа. Монголын шүүх эмнэлгийн дүгнэлт талийгаачийн үхэл гадны нөлөөгүй гэж гарсан тул Монгол улсын ерөнхийлөгч холбогдох албаны хүмүүсийг шударга ажиллах үүрэг өгч, дахин хяналт тавихыг шаардлага тавьсан. Улмаар Ерөнхий прокурор Д.Дорлигжав талийгаачийн үхлийн шалтгааныг тогтоохоор   дахин задлан шинжилгээ хийж,  шинжээчийн дүгнэлт гаргах үүрэг өгсний дагуу Шүүхийн шинжилгээний үндэсний төвөөс өөр шинжээчийн бүрэлдэхүүн томилсон байна. Одоогоор мөрдөн байцаалтын ажиллагаа үргэлжилж байгаа бөгөөд Г.Алтанхүүгийн хамаатан гэгдэх н.Болормаа, Г.Бурмаа нараас байцаалт мэдүүлэг авчээ.  н.Болормаагийн хувьд талийгаач бүсгүйг хэд хэдэн хувийн эмнэлгээр дагуулж  явж, сүүлд ГССҮТ-д  хүргэж ирсэн нэгэн юм.  Харин сэжигтний дүү  Г.Бурмаа тус хэрэгтэй холбогдуулан мэдээллийн сайтууд болон ахыг нь "алуурчин" гэж хэлсэн хохирогчийн эгч Хандсүрэнд эрүү үүсгэн шалгаж өгнө үү гээд Чингэлтэй дүүргийн цагдаагийн хэлтэст ханджээ. ЧД-ийн дүүргийн цагдаагаас Г.Бурмаагийн гомдлын дагуу  иргэн Хандсүрэнг дуудаж байцаасан байна. Энэ талаар хүний эрх болон нийгмийн идэвхтэй иргэд санаа оноогоо цахим ертөнцөөр дэлгэж байна. Тухайлбал хүний эрхийн хуульч, тус хэрэгт стратегийн өмгөөлөл үзүүлж буй М.Ичинноров өөрийн цахим хуудастаа “Ийм хөгийн юм байх гэж... Үнэндээ бол санаа сэтгэл нь цочрон давчидсан хүмүүс үхлүүт хэвтэх хөөрхий дүүгээ хараад "Муу алуурчин дүүг минь ямар болгосныг та нар хараач" гэж хэлсэн байдаг. Харин ч тэгж хэлэх багадаа юу? Одоо харин ч цагдаа шүүхэд дуудан дарамтлах нь дутаа юу даа.” гэжээ.  

Амьдралд дөнгөж хөл тавьж, насаараа ханилах хүнээ сонгохдоо талийгаач бүсгүй аз жаргал, сайн сайхныг зөгнөн явсан бизээ. Ганц охиноо тулж түших хань ижлээ сонгосон тухайгаа хэлэхэд ээж, аав хоёр нь ч бүр илүү сайхныг төсөөлөн бодож байсан нь мэдээж. Харин цэцэг цэврүү шиг сайхан охиноо нүд хальтрам болтлоо зодуулж, тамлуулсныг харсан хамаатан садных нь сэтгэл зүрх хэр өвдсөнийг, хайртай ганц охиноо эцсийн удаа харж, үгийг нь сонсож амжаагүй ээж, аав хоёрт нь одоо хир ямар байгааг Г.Алтанхүүгийн гэр бүлийнхэн ойлгохыг ч хүсэхгүй байгаа бололтой.