Өмчлүүлэх ой нь 0,5 га-гаас багагүй талбайд ойт хээрийн бүсэд 700, тал хээрийн бүсэд 500, говь цөлийн бүсэд 300-аас доошгүй мод тарьж, 5-аас дээш жил арчилж ургуулсан, 8 ба түүнээс дээш настай модноос бүрдсэн цаашид ургаж, амьдрах чадвар бүхий таримал ой байна. Иргэн, ойн нөхөрлөл, аж ахуйн нэгж, байгууллагад өмчлүүлсэн ой нь зөвхөн газрын гадарга дээр ургаж буй ой хамаарах бөгөөд түүний доорхи газар, газрын хэвлий өмчлөлд хамаарахгүй аж.

 

Хэрвээ та өөрийн тарьж, ургуулсан ойгоо өмчилж авахыг  хүсвэл өмчлөхийг хүссэн өргөдөл, таримал ойн гэрэл зураг,  ойн ангийн /ойн ангигүй тохиолдолд байгаль хамгаалагч/ тодорхойлолт, газрын кадастрын зураг, мэргэжлийн эрдэм шинжилгээний байгууллагын дүгнэлтийг харьяа аймаг, нийслэлийн Байгаль орчны газартаа жил бүрийн 7дугаар сарын 5-ны дотор  өгнө. Энэхүү баримт, материалыг Аймаг, нийслэлийн Байгаль орчны газар хянаж үзээд 8 дугаар сарын 5-ны дотор Байгаль орчны асуудал эрхэлсэн төрийн захиргааны төв байгууллагад шилжүүлнэ. Байгаль орчны асуудал эрхэлсэн төрийн захиргааны төв байгууллага нь таримал ойн материалуудыг өмчлүүлэх боломжтой эсэхийг тодорхойлон  тухайн сум, дүүргийн Засаг даргад 9 дүгээр сарын 1-ний дотор хүргүүлнэ. Ийнхүү өмчлүүлэх болзол хангасан таримал ойн эздэд Сум, дүүргийн Засаг дарга захирамж гаргаж, таримал ойг өмчлүүлсэн тухай гэрчилгээ олгоно.