Дүрвэгчид улсынх нь хилээр хууль бусаар нэвтэрсэн тохиолдолд улс төрийн орогнол хүсэх эрхгүй, зөвхөн хилийн боомтоор нэвтэрсэн тохиолдолд орогнол хүсэх эрхтэй болгож хуулиа өөрчилнө гэж Америкийн засаг захиргаанаас энэ 11 дүгээр сарын эхээр мэдэгдсэн. Улс төрийн орогнол хүсэх нөхцлийг чангатгасан АНУ-ын ерөнхийлөгч Доналд Трампын энэ бодлогыг Сан Франциско хотын дүүргийн шүүхээс даваа гарагт түр хугацаанд хориглох тогтоол гаргалаа.

Америк дахь хүний эрхийн байгууллагуудын зүгээс энэ асуудлаар шүүхэд гомдол гаргаад байсан юм. Тэд улсынх нь хилээр хууль бусаар нэвтэрсэн эсэхээс нь үл хамааран дүрвэгчдэд улс төрийн орогнол хүсэхийг Америкийн хуулиар зөвшөөрдөг, үүнийг өөрчлөх нь цагаачдыг улам ихээр эрсдэлд оруулна хэмээн үзэж байгаа юм.

Сан Франциско хотын дүүргийн шүүхийн хориглох шийд АНУ даяар ирэх 12 дугаар сарын 19 хүртэл үйлчлэх юм байна. Өөрөөр хэлбэл, АНУ-ын хилээр хууль бусаар нэвтэрсэн эсэхээс үл хамааран орогнол хүсэх боломж хэвээр үргэлжилнэ. Одоо үүнтэй холбоотойгоор шүүхийн шийдвэр Америк Мексикийн хил дээр ямар үр дагавар дагуулах бол гэсэн асуулт гарч байна. Төв Америкийн улсуудаас ирсэн хэдэн мянгаар тоологдох цагаач дүрвэгчид Америкийн өмнөд хилд эхнээсээ ирээд байгаа юм.