Венесуэлийн Ерөнхийлөгч Николас Мадуро Ерөнхийлөгчийн тангараг өргөж, хоёр дахь бүрэн эрхийн хугацаагаа эхлүүллээ. Тэрбээр өчигдөр тангараг өргөснөөр 2025 он хүртэл дахин 6 жил Венесуэлийн Ерөнхийлөгчөөр ажиллах болж байна.

Николас Мадуро өнгөрөгч 2018 онд ээлжит бусаар зарласан Ерөнхийлөгчийн сонгуульд ялалт байгуулахад сөрөг хүчнийхэн нь сонгуулийн үйл ажиллагаанд саад учруулж, луйврын сонгууль боллоо гэж НҮБ, Европын холбоо болоод бусад улс орнууд шүүмжилж байсан юм.

Улмаар Николас Мадурог Венесуэлийн Ерөнхийлөгчөөр хүлээн зөвшөөрөхгүй гэдгээ хэд хэдэн улс илэрхийлээд байгаа юм. Мексикээс гадна Латин Америкийн 14 улс Канад зэргээс бүрддэг Лимагийн бүлэг улс түүнийг шинэ сонгууль дахин явуултал Үндэсний ассамблейдаа эрх мэдлээ шилжүүлж буулт хийхийг шаардсан.

Мөн Америк тивийн 35 улсаас бүрддэг Америкийн улсуудын байгууллага Мадурогийн Засгийн газрыг хууль бус хэмээн дүгнэж тогтоол гаргаад байна. АНУ-ын Төрийн нарийн бичгийн дарга Майк Помпео “АНУ Мадуро дарангуйлагчийн хууль бусаар дахин Ерөнхийлөгч болж байгааг хүлээн зөвшөөрөхгүй. Авлигад идэгдсэн түүний дэглэмд хориг шахалтаа чангатгаж, сөрөг хүчнийхний давамгайлалтай Үндэсний ассамблейг нь дэмжинэ. Венесуэльд ардчилал, эрх чөлөө бий болгоход уриална” гэж твиттер хуудсандаа бичсэн байна.

Харин Николас Мадуро өчигдөр Венесуэлийн дээд шүүхийн байранд хэдэн зуун хүний өмнө тангаргаа өргөж, цэргийн академид болсон ёслолд оролцжээ. Түүнийг тангараг өргөснөөс хэдхэн минутын дараа Парагвайн Ерөнхийлөгч Марио Абдо Бенитез Венесуэль улстай дипломат харилцаагаа цуцалж, тус улсаас дипломатуудаа татаж байгаагаа зарлажээ.