Азийн хамгийн хөгжин цэцэглэж байгаа улсуудын нэг болох Бруней улсад өнөөдрөөс эхлэн Шариатын хууль үйлчилж байна. Шариатын хууль нь харгис шийтгэлээс цаазын ялыг хүртэл хүлээн зөвшөөрдөг хатуу хууль юм. Энэ хуулийг хэдэн жилийн өмнө баталсан боловч Брунейн султан хуулийг  хэрэгжүүлэхээс татгалзсаар иржээ.

Харин манай гарагийн хамгийн баян хүний тоонд багтдаг султан ямар шалтгаанаар шийдвэрээ өөрчлөх болсон нь тодорхойгүй байна. Гэхдээ энэ хууль 430 мянган хүн амтай тус улсын гуравны хоёрыг бүрдүүлдэг лалын шашинтнуудад л үйлчилнэ гэж "ТАСС" агентлаг мэдээллээ.

Шариатын хуулиар нөхрөөсөө урвасан, нөхрөө хуурсан эмэгтэйг чулуугаар цохиж хөнөөдөг. Хулгайн хэргээр анх удаа баригдсан хүний баруун гарыг тасдах, хоёр дахь удаад хөлийг нь тайрах шийтгэл ногдуулдаг. Мөн өөр төрлийн зөрчил гаргасан тохиолдолд олны өмнө зодож занчиж шийтгэдэг байна.

НҮБ болон Олон улсын хүний эрхийн байгууллагуудаас Бруней улсыг хүн эрхийн салбарт ухралт болно гэж үзээд Шариатын хуулийг нэвтрүүлэхээс татгалзахыг уриалж байсан юм.