Сирийн Дамаск хотын захад болон Хомс хотод агаарын цохилт хийсэн тухай Сирийн төрийн өмчит телевизээс мэдээлж байна. Орон нутгийн цагаар даваа гарагийн 00 цаг 30 минутын үед Сирийн нийслэлийн агаарт хэд хэдэн дэлбэрэлт болжээ. Энэ үеэр Сирийн агаарын эсрэг хамгаалалтын хэрэгсэл Дамаскийн агаарт гурван пуужинг сөнөөсөн байна. 

Ливаны “Аль-Маяден” сувгийн дамжуулснаар дэлбэрэлт Сири, Ливаны хилийн ойролцоо ч сонсогдсон гэнэ. Халдлагын үеэр дөрвөн хүн амиа алдсаны нэг нь хүүхэд юм байна. Мөн 21 хүн шархаджээ.

Сирийн цэргийн эх сурвалжийн “РИА Новости” агентлагт мэдээлснээр бол Дамаск, Хомс хотын ойролцоо болсон халдлагыг Израилийн Агаарын цэргийн хүчин үйлдсэн байна.

Бейрутын олон улсын нисэх онгоцны буудлын эх сурвалж ч энэ халдлагыг Израилийн 10-аад онгоц Ливаны агаарын орон зайгаас үйлдсэн гэдгийг баталж байна. Цэргийн онгоцууд Ливаны хойд хэсгийн Кисервен хотын дээгүүр эргэлдсэн гэнэ. Харин энэ асуудлаар Израилийн Батлан хамгаалах армийн төлөөлөгчид ямар нэгэн тайлбар хийхээс татгалзсан гэж “Ройтерс” агентлаг мэдээлж байна.