Ирэх 2020 онд болох АНУ-ын Ерөнхийлөгчийн сонгуульд Доналд Трамптай өрсөлдөх Ардчилсан намын нэр дэвшигчийг сонгох үйл явдлын хүрээнд Детройт хотноо Ардчилсан намаас АНУ-ын төрийн тэргүүнд нэр дэвшигчдийн хоёр дахь удаагийн халз мэтгэлцээн үргэлжилж байна. Халз мэтгэлцээнд 20 улстөрч оролцохоор болсноос өнгөрсөн мягмар гарагт эхний 10 нэр дэвшигч тайзнаа мэтгэлцлээ.

Тэдний дунд Ардчилсан намын зүүний жигүүрийн удирдагч, сенатч Берни Сандерс болон Элизабет Уоррен нар олны анхаарлыг татаж байлаа. Хоёр нэр дэвшигч ихэнх асуудалд ижил байр суурьтай байж, төрийн эрүүл мэндийн системд шилжихийг амласан юм. Үүний тул баячууд болон томоохон корпорациудаас авах татварын нэмэгдүүлнэ гэжээ. Шинжээчид хоёр дахь удаагийн халз мэтгэлцээний эхний өдрийн ялагчаар хоёр сенатчийг нэрлэж байна. Халз мэтгэлцээний үеэр нэр дэвшигчид нийт 95 удаа дайралт хийснээс 34 нь Трампын эсрэг дайралт, 30 гаруй нь мэтгэлцээнд оролцогчдын бие бие рүүгээ хийсэн дайралт байсан тухай “Эн-Би-Си Ньюс” дамжуулсан байна.

Харин экологийн асуудалд анхаарлаа хандуулдаг Гринпис хөдөлгөөний төлөөлөгчид Ардчилсан намынхны халз мэтгэлцээнд сэтгэл дундуур байна. Тэд нэр дэвшигчдийг цаг уурын асуудалд хангалттай анхаараагүй, мэтгэлцээнийг зохион байгуулагчид оролцогчдод буруу асуудал дэвшүүлсэн гэж үзжээ.