Ангины гаралтай хэрх өвчин нэмэгдэж байгааг эмч нар анхаарууллаа. Хүүхэд, залуусын дунд хэрхийн шалтгаант зүрхний өвчин ихсэх хандлагатай байна. Тухайлбал, энэ өвчнөөр улсын хэмжээнд 28 мянган хүн өвчилсний 60 хувь нь 18 хүртэлх насных, үлдсэн нь 30 хүртэлх насныхан байгаа юм.

Хэрхийн шалтгаант зүрхний өвчнөөс урьдчилсан сэргийлэх зорилгоор өнгөрсөн онд нийслэлийн гурван сургуулийн 2000 орчим сурагчийг үзлэгт хамруулахад 20 хувийнх нь хоолой нь дахин дахин өвддөг, улмаар хэрхийн шалтгаант зүрхний өвчтэй болох нь тогтоогджээ.

“Шүд өвчлөх, хоолой өвдсөн үед тухайн өвчний халдвар авдаг” гэж Зүрхний төвийн захирал н.Мөнгөнчимэг ярьж байна.

АНУ тэргүүтэй хөгжингүй орнууд энэ өвчнийг бүрэн устгасан бол хөгжиж буй Ази, Африкийн орнуудад зонхилон тохиолдож байна. ДЭМБ-аас мэдээлснээр олон улсад хэрхийн гаралтай зүрхний өвчтэй 15 сая хүн байдаг. Жилд дунджаар 230 мянган хүн энэ өвчнөөр нас бардаг байна.