Италийн мафийн эсрэг том ажиллагаагаар гэмт хэргийн бүлэглэлтэй холбоотой улс төрчид болон цагдаа нарыг баривчилжээ. Тус улсын өмнөд эргийн Калабрия гэдэг мужид төвлөрдөг Ндрангета мафийн бүлгийнхнийг баривчлах ажиллагаа болсон байна.

Хууль сахиулах 2500 ажилтныг оролцуулсан баривчилгаагаар 300 гаруй хүнийг саатуулсны дотор мафийн Ндрангета бүлэгтэй холбоотой хэмээн сэжиглэж буй улс төрчид, цагдаа нар байгаа юм байна. Тэр дундаа 2008-2011 онд Италийн Ерөнхий сайд байсан Сильвио Берлусконийн “Форза Италия” намын гишүүн, парламентын гишүүн асан, алдартай хуульч Жанкарло Питтелли, мөн мужийн захирагч, улс төрчийн намын гишүүн, цагдаагийн дарга байсан нэг хүн байгааг хэвлэлүүд мэдээлж байна.

Тэдний хамт баривчлагдсан улс төрчид болон цагдаагийн албаныхан Ндрангета мафийнхантай хамтарч ажилладаг, бусдыг сүрдүүлэн мөнгө салгадаг, хүний амь насанд хүрч байсан, мөнгө угаасан гэж сэжиглэгдэж буй юм байна.

Итали улсын түүхэн дэх мафийнхны эсрэг 2 дахь том энэ ажиллагааг 2016 онд эхэлж, Италийн 11 мужийг хамруулан шалгасан байна. Пүрэв гарагт хүмүүсийг баривчлах үеэр мафийн бүлгийн 17 сая доллартай тэнцэх хөрөнгийг хураажээ.

Баривчилгааны дараа Италийн парламентын Мафитай тэмцэх хорооны дарга Николла Морра “Өнөөдрөөс эхлэн Калабрия мужид эрх чөлөө үнэртэнэ” гэж хэлсэн байна. Үүнээс өмнө 1986-1992 оны хооронд Сицилийн мафийнхныг баривчилж байжээ.  

Италийн мафийн гурван том бүлгийн нэг Ндрангета бүлэг нь Сицилийн мафи шиг гадаад улсуудад цуутай биш ч гэлээ, орон нутгийнхан дунд зартай. 1990-ээд оны сүүлч 2000-аад оны эхээр Италийн хамгийн нөлөөтэй гэмт хэргийн бүлэг болж байжээ.