Цэргийн дуу бүжгийн эрдмийн чуулгын уран бүтээлчид орчин цагийн Зэвсэгт хүчин үүсэн байгуулагдсаны 100 жилийн ой, “Монгол цэргийн өдөр”-өөр үзэгч олонд толилуулах хүндэтгэлийн тоглолт болон чуулгын гоцлол уран бүтээлчдийн теле концертын бэлтгэл ажлыг хангаж, бэлэн болгожээ.  МҮОНТ, ТV8 телевизээр Зэвсэгт хүчний 100 жилийн ойн хүндэтгэлийн тоглолт, МҮОНТ, ТV5, UBS, TV25, NTV, C1 зэрэг телевизийн сувгаар “Эх орны цэрэг” яруу найргийн наадам, “Эх орны дуудлага” гоцлол уран бүтээлчдийн теле концерт болон чуулгын уран бүтээлчдийн тоглолт болон бусад уран бүтээл цацагдана. Мөн Зэвсэгт хүчний түүхэн их ойг тохиолдуулан бүтээсэн “Мартах учиргүй”, “Амрагийн дуу”, “Эх орон танаа”, “Миний залуу нас цэрэг явлаа” зэрэг чуулгын уран бүтээлчдийн клип шил шилээ даран гарч, үзэгч олондоо хүрч эхэлсэн.

Ташрамд сонирхуулахад, Зэвсэгт хүчний 100 жилийн ойн хүндэтгэлийн тоглолт Монгол ардын хувьсгалт цэрэг, Ардын арми, энх цагийн бүтээн байгуулалтад онцгой үүрэг гүйцэтгэсэн цэрэг дайчид, орчин цагийн Зэвсэгт хүчний түүхийг урлагийн бүтээлээр дамжуулан харуулсан өгүүлэмжтэй бөгөөд ЦДБЭЧ-ын энэхүү тоглолтод Төрийн соёрхолт “Харанга” хамтлагийн уран бүтээлчид оролцож, хамтарсан шинэ уран бүтээл туурвисан юм.