Хятадын Шэньчжэн хотын Яньтань боомтыг хэсэгчилж хааснаас болж дэлхийн чингэлэг тээвэрт хүндрэл учрах аюул эрсдэл нүүрлээд байгааг мэргэжилтнүүд онцолжээ. Салбарын  мэргэжилтнүүд өнгөрсөн 3 дугаар сард  Суэцийн сувгийг Эвер Гивен далайн тээврийн онгоц хааснаас ч ноцтой хохирол учирч болзошгүй хэмээн болгоомжлуулж байна.

Боомтыг  хэсэгчлэн хаах болсон нь Гуандун мужид коронавирусний халдвар тархсантай холбоотой юм. Хүндрэл дан ганц Яньтань боомтод төдийгүй дэлхийд 3 болон 5-д бичигддэг Шэньчжэний  Шэкоу, Гуанжугийн Наньша терминалуудад үүсээд  байгаа аж. Шэньчжэний боомтын захад болон тус боомтод асар их хэмжээний ачаа бүхий чингэлгүүд овоорчхоод байгаа юм. Тодорхой  хэсгийг нь Наньшу,  Шэкоу, Хонконгийн боомтууд  илгээж байгаа  ч хүчин  чадал нь  хүрэлцэхгүй байгаа юм  байна. 

Чингэлэгт ачаануудыг буулгаж дахин ачих үйл явц 7 хоногоор саатаж байгаагаас чингэлэг тээвэрлэлтийн хугацаа  15-16 хоногоор сунаж байгаа юм байна. Зарим тээвэрлэгч хөлөг онгоцнууд 7 хоногоор саатаж байгаагаас болж Наньша  боомтод  л гэхэд бөглөрөл  үүсчээ. Мэргэжилтнүүд энэ нөхцөл байдал энэ зуны  эцэс, ирэх намрын эхээр тогтворжихоор байгаа ч ахиад  2-3 улирал дараалж чингэлэг тээвэрлэлтэд саатал  гарна гэж болгоомжлуулж байна.

Мөн энэ саатлаас болж чингэлэг тээвэрлэлтийн үнэ  эрс өсч байгааг ч анхааруулж байна.