“Бээжин-2022” өвлийн олимпын наадмын нээлтийн дараа Хятад улсын дотоодод тус олимпын бэлгэдэл буюу "Бин Дүньдүнь" гэх пандаг бэлэг дурсгалын зориулалтаар худалдан авах гэсэн эрэлт хэрэгцээ огцом нэмэгджээ. Цахим дэлгүүрүүд уг бэлэг дурсгалын зүйлийг борлуулж дууссан бол нэрийн дэлгүүрүүдийнх нь үүдэнд худалдан авах хүсэлтэй хүмүүс урт дараалалд зогсон хэдэн цагаар хүлээсний эцэст дэлгүүрээр үйлчлүүлж байна хэмээн CCTV мэдээллээ.

Бээжингийн өвлийн олимпын бэлгэдэл "Бин Дуньдунь" болон өвлийн паралимпын бэлгэдэл цасан дэнлүү буюу "Шюэ Рунрун"-ын шаазан хувилбарыг Фүжянь мужийн Чуанжоугийн Дэхуа шяньд үйлдвэрлэдэг байсан бөгөөд Хятадын Цагаан сарын баяраар тус үйлдвэр амарсан нь нийлүүлэлт багасах шалтгаан болсон байна.

Харин энэ сарын 8-наас Бээжингийн өвлийн олимпын бэлгэдэл хулсны баавгайн сувинерийн үйлдвэрүүд эрчимтэй ажиллаж эхэлсэн бөгөөд энэ сарын 15-н гэхэд өвлийн олимптой холбоотой дурсгалын зүйлсийг зарах цахим болон томоохон салбар дэлгүүрт бүх төрлийн барааг ханган нийлүүлэх юм байна.