Шууд Chart

АНУ: Газын зурваст гал зогсоох, барьцааны хүмүүсийг суллах асуудлаар талууд ойлголцолд хүрсэн

2024-02-27 10:32:47

Израил болон зуучлагч талууд Хамас бүлэглэлийн барьцаанд байгаа хүмүүсийг суллуулж, хариуд нь Газрын зурваст түр гал зогсоох талаар ойлголцолд хүрсэн. Одоо эцсийн тохиролцоонд хүрэхийг л хүлээж байна гэж Цагаан Ордоны Үндэсний аюулгүй байдлын зөвлөх мэдэгдлээ. Израил-Хамасын дайныг зогсоох асуудлаарх хэлэлцээ Парис хотноо болж байгаа. Энд дайтагч талуудын дунд АНУ, Египет, Катар зэрэг улсууд зуучилж байна.

Газын зурваст түр гал зогсоох, барьцааны хүмүүсийг суллах гэрээний хэлбэр ямар байх талаар Израил болон зуучлагч улсууд ойлголцолд хүрсэн гэж АНУ-ын үндэсний аюулгүй байдлын зөвлөх Жейк Салливан мэдэгджээ. Одоогоор хэлэлцээ үргэлжилж байгаа учраас Жейк Салливан илүү нарийн мэдээлэл өгөхөөс татгалзжээ. Тэрээр эцсийн тохиролцоонд хүрэхийг хүлээж байна. Хамас бүлэглэл барьцаалагдсан хүмүүсийг суллахыг зөвшөөрөх ёстой гэсэн байр суурийг мөн илэрхийлжээ. Израилын ерөнхий сайд Нетаньяху ч зуучлагч талуудтай тохиролцоонд хүрч байгааг нотлож, зуучлагчдын нэг Катар улсад хэлэлцээ мэргэжилтний түвшинд эхэлснийг мэдэгджээ.

Мөн Израилын арми, Хамас бүлэглэлийн хооронд дайны галыг хоёр долоо хоног зогсоохоор тохиролцож чадвал Египеттэй залгаа өмнөд хилийн Рафах хотод армийн довтолгоо явуулах хугацааг хойшлуулж магадгүйг Израилын талаас мэдэгджээ. Харин АНУ Рафах хотод толгой хоргодож байгаа 1 сая гаруй энгийн иргэнийг хамгаалах төлөвлөгөөгүй бол тус хот руу цэргийн хүчээр довтолж болохгүйг Израилд дахин анхааруулжээ. Энэ үеэр Израилын батлан хамгаалахын сайд Газын зурваст түр гал зогсоох нь Хезболла бүлэглэлийг улс орныхоо хойд хилээс зайлуулах тэмцэлд нөлөөлөх ёсгүй гэж мэдэгдсэн байна.

Өөрөөр хэлбэл Газын зурваст Хамасын эсрэг дайны галыг зогсоосон ч Левантай залгаа хойд хилд нь тулж ирсэн Хезболла бүлэглэлийг нутгаасаа хөөж гаргах ажиллагаа зогсох ёсгүй гэж Израилын засгийн газар байр сууриа илэрхийлж байна.

Нийтэлсэн: Moнголын мэдээ

АНУ: Газын зурваст гал зогсоох, барьцааны хүмүүсийг суллах асуудлаар талууд ойлголцолд хүрсэн   
Үзсэн: 716 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү
Иргэн [127.0.0.xxx] 2024-02-27 23:33
АНУ Израйл болиосой

Бидэнтэй нэгдээрэй