Жүдо бөхийн залуучуудын ДАШТ-ий тав дахь өдөр буюу өнгөрөгч бямба гарагт АНУ-ын Лодердейл хотноо  болсон хүнд жингийн барилдаанд +100 кг-ийн жинд хүч үзсэн манай жүдоч Ө.Дүүрэнбаяр жиндээ аваргаллаа. Ө.Дүүрэнбаяр сарын өмнө БНСУ-ын Инчёны Азийн 17-р наадмын татамиас мөн энэ жиндээ оролцож, мөнгөн медаль хүртэж байсан юм.

Манай улсын жүдо бөхийн залуучуудын шигшээ багийн тамирчин Ө.Дүүрэнбаяр эхний барилдаанаа Эстонийн тамирчин Сильдвийр Хенричтэй хийж, дэлхийн аваргын барилдааныхаа салхийг хагалсан юм. Тэрээр өрсөлдөгчөө 02:09 секундэд цэвэр ялснаар дараачийн шатандаа Египетийн жүдоч Селим Халидтай барилдахаар учраа таарсан юм. Энэ барилдаанд тэрээр өрсөлдөгчөө юко үнэлгээгээр ялж, хэсгийн аваргын төлөө БНСу-ын жүдоч Чой Мин Янгийг иппон үнэлгээгээр ялсан. Улмаар хагас шигшээд Украйны тамирчин Кхаммен Лакивыг юко үнэлгээгээр дийлж, аваргын алтан медалийн төлөө өрсөлдөх эрхтэй болсон юм. Шигшээ барилдаанд тэрээр Гүржийн жүдоч Кибордзалидзе Гугаг 02:14 секундэд цэвэр ялснаар ийнхүү ДАШТ-ий тав дахь өдөр аваргын алтан медалийг эх орондоо авчирч, жүдо бөх сонирхогчдыг баярлууллаа.

Мөн түүний энэ амжилт цаашид манай улсаас хүнд жинд гаргах амжилтуудын буухиа болно гэж сонирхогчид үзэж байна.