МАН-ын “Шинэчилье” хөдөлгөөнийхөн, Бага хурлынхаа үеэр санасандаа хүрсэн үү, аль эсвэл намын одоогийн Удирдах зөвлөлийнхөнтэйгээ тохиролцсон уу юутай ч энэ удаагийн хурлаар зарим нэг тохиролцоонд хүрээд авсан бололтой.

 

Бага хурлын эхний хэсэгт өнөө л уламжлалт “зохиол”-ынхоо дагуу намын даргын илтгэлийг сонссон бол, дараа нь залгуулаад МАН-ын “Шинэчилье” хөдөлгөөний тэргүүн, УИХ-ын гишүүн Ж.Эрдэнэбатын шинэчлэлийн илтгэлийг сонссон юм. Үүнээс цааш билэгдлийн Бага хурал өнөөдрийн хүртэл хаалттай болж өндөрлөсөн нь энэ.

 

Гэхдээ, МАН-ын “Шинэчилье” хөдөлгөөнийхөн оргүйгээс ортой гэгчээр МАН-ын Их хурлаа 2013.10.27-ны өдөр өргөтгөсөн хэлбэрээр хуралдуулахаар санасандаа хүрч чадсан нь энэ удаагийн хурлын гол хөзөр нь байлаа гэхэд болно.

Юутай ч МАН-ын VIII Бага хуралд бүлэглэлүүд тус тусынхаа шинэчлэлийн байр сууриа илэрхийлсэн, үзэл бодлоо дэвшүүлсэн хурал болж чадлаа хэмээн зарим нэг гишүүд үзлээ.

 

Ерөнхийлөгчийн сонгуулиас хойш ассан МАН-ын залуучуудын гал ийнхүү Бага хурал хүрээд “цурманд” орлоо. Энэхүү “цурам” нь ирэх намар болох МАН-ын Их хурлаар гадагш сэдрэх, эсэх нь МАН доторх бүлэглэлүүдийн нааш, цааш хөдөлгөөн, тохиролцоо нь хэрхэн явагдахаас шалтгаалах биз ээ. Өөрөөр хэлбэл МАН-ын шинэчлэлийн бусад асуудал, хариуцлага, намын цаашдын хувь заяаг Их хурлын нийт төлөөлөгчдийн гарт үлдээлээ...