Сургалтын төрийн сангаас оюутнуудад олгодог зээлийн журам өөрчлөгдөөгүй гэж Төрийн сангийн мэргэжилтнүүд хэлж байна. Одоо мөрдөж байгаа  Төрийн сангийн зээлийн журам батлагдаад удаагүй байгаа юм. Сургалтын төрийн сангийн тэтгэлэг олгох журмыг Засгийн газрын 2012 оны нэгдүгээр сарын 18-ны 19 дүгээр тогтоолоор баталжээ. Оюутнуудад төрөөс эх орны хишиг 500 мянган төгрөг, 70 мянган төгрөгийн тэтгэлэг олгох болсноор төрийн албан хаагчийн нэг хүүхэд үнэгүй сурах, мөн гурван хүүхэдтэй айлын нэг хүүхэд үнэгүй сурах гэсэн заалтыг тус журмаас хассан аж. Үүний дагуу 2012-2013 оны хичээлийн жилд оюутнуудад сургалтын төрийн сангийн тэтгэлэг олгосон байна.
 2013-2014 оны хичээлийн жилд мөн энэ журмыг мөрдөж тэтгэлэг олгоно гэлээ.

Их, дээд сургуульд шинээр элсэгчид ЭЕШ-аар авсан онооноосоо шалтгаалж сургалтын төрийн сангийн зээл, буцалтгүй тусламж, тэтгэлэгт хамрагдах боломжтой байдаг. Тухайлбал, буцалтгүй тусламжид бүтэн өнчин, өөрөө хөгжлийн бэрхшээлтэй эсвэл эцэг эх, ар гэрээс нэг нь хөгжлийн бэрхшээлтэй тохиолдолд хамрагдах боломжтой юм байна. Хөгжлийн бэрхшээлтэй ар гэрийнхний хувьд хөдөлмөрийн чадвар 70 хувиар алдсан, эсвэл суралцагч өөрөө 50 хувиас дээш хөдөлмөрийн чадвараа алдсан тохиолдолд хамрагдах юм.

Түүнчлэн хөнгөлөлттэй зээлд хагас өнчин, малчин, нэн ядуу өрхийн болон цэргийн албыг хоёр жилээс дээш хугацаагаар хаасан оюутнууд хамрагдах боломжтой. Энэ зээлийн санхүүжилт нь ангиасаа шалтгаалж 350-650 мянган төгрөгийн хооронд байдаг аж. Шинээр их, дээд сургуульд элсч байгаа оюутнууд хөнгөлөлттэй зээлд хамрагдахын тулд ЭЕШ-ын 600-гаас дээш оноотой байх ёстой аж.

Ингэж эхний жил тэтгэлэгт хамрагдсан оюутны голч дүн суралцах хугацаандаа 2,8-аас дээш байх ёстой гэдгийг дээрх журамд заажээ. Хэрэв тухайн оюутан чөлөө авсан, эсвэл журамд заасан голч дүнгийн шаардлага хангахгүй суралцсан тохиолдолд дээд боловсролын сургалтын байгууллагын албан ёсны мэдэгдэл, саналыг үндэслэн гэрээг цуцалж, санхүүжилтийг зогсоох аж. Голч дүнгийн үзүүлэлтээр хасагдсан суралцагчийн оронд тухайн дээд боловсролын сургалтын байгууллагад нэг хичээлийн жилээс доошгүй хугацаанд 2.8-аас дээш голч дүнтэй суралцаж байгаа суралцагчийг зээлд хамруулж болох юм.

Төрийн сангийн буцалтгүй тусламжийн тэтгэлэгт хамрагдахын тулд элсэгчид харьяа сум, дүүргийнхээ ЗДТГ-т холбогдох материалаа бүрдүүлэн Засаг даргаасаа дэмжсэн тодорхойлолт авахаас гадна тухайн Засаг даргын тодорхойлолтыг элсэн орох их, дээд сургуульдаа өгөх журамтай. Харин Монгол Улсын боловсролын их сургууль буюу багш бэлтгэдэг төрийн өмчит сургуульд элссэн суралцагч оюутан төрийн сангийн хөнгөлөлттэй зээлд хамрагдах нөхцлийг хангасан тохиолдолд төлбөрийг орон нутгийн төсвөөс 100 хувь хариуцахаар болжээ.