2012 оноос эхлэн өрхийн эмнэлгүүдэд умайн хүзүүний хорт хавдрыг эрт илрүүлэх эсийн шинжилгээг үнэ төлбөргүй авч эхэлсэн ч, иргэд тэр бүр үйлчлүүлэхгүй байгаа талаар мэргэжилтнүүд ярьж байна. Уг шинжилгээнд 30, 33, 36, 39, 42, 45, 48, 51, 54, 57, 60 настай эмэгтэйчүүд хамрагдах боломжтой бөгөөд энэ жилийн тухайд 1985, 1982, 1979, 1976, 1973, 1970, 1967, 1964, 1961, 1958, 1955 оны хүмүүс үнэ төлбөргүй хамрагдах боломжтой ажээ.

Тодруулбал, энэхүү шинжилгээг эмэгтэйчүүд харьяа өрхийн эмнэлгүүддээ өгөх боломжтой бөгөөд сарын тэмдгийн мөчлөгөөс бусад үед шинжилгээг авах боломжтой юм. Дашрамд дурдахад, эмэгтэйчүүдийн дунд тохиолдох хорт хавдрын өвчлөлийн гуравдугаарт умайн хүзүүний хорт хавдар орж, нийт хорт хавдрын тохиолдлын есөн хувь, эмэгтэйчүүдийн хорт хавдрын 12 хувийг эзэлдэг аж.

Хавдраас сэргийлэх өдөр 2015 оны 11 дүгээр сарын 1-14-ний өдрүүдэд үргэлжилж байна.