Японы зорчигч тээврийн анхны тийрэлтэт онгоц “Эм-Ар-Жей” өнгөрсөн долоо хоногт өндөр хурд авах туршилтаа амжилттай хийсэн. Харин өнөө өглөө энэ онгоц Аичигийн нисэх буудлаас хөөрч, 90 минутын турш агаарт янз бүрийн хөдөлгөөн  хийж туршин, амжилттай газардсан байна.

Маневрлах туршилтыг хийхэд Японы цэргийн нисэх хүчний онгоц дагалдан явж, туршилтын нислэгийг ажигласан байна. Японд иж бүрэн, 100 хувь үйлдвэрлэсэн анхны тийрэлтэт “Эм-Ар-Жей” буюу “Мицубиши Режьонал Жет” онгоцны эд ангийг одоогоос таван жилийн өмнө анх бүтээжээ. Зохион бүтээгчдийнх нь ярьснаар, энэхүү агаарын хөлөг 1500-3500 км зам туулах хүчин чадалтай, 2017 он гэхэд анхны захиалагчдынхаа гар дээр очих боломжтой болно гэж тооцоолж байгаа юм байна. Эм-Ар-Жей” онгоцыг одоогоор хэд хэдэн загвараар үйлдвэрлэхээр төлөвлөж байна.

Эхний “Эм-Ар-Жей 70” онгоц 78 хүний суудалтай байх бол, удаах загвар нь болох “Эм-Ар-Жей 90” онгоц илүү уртасгасан эх биетэй тул 92 зорчигч тээвэрлэх боломжтой байх юм байна.  Урт загварын “Эм-Ар-Жей 90” онгоцны зах зээлийн үнэ 47 сая америк доллар байна гэсэн урьдчилсан судалгаа гарсан байна.