Ардчилсан Үндсэн хуулийн 24 жилийн ойн өдөрт зориулсан улс, аймгийн алдар цолтой 224 бөхийн барилдаан өчигдөр Монгол бөхийн өргөөнд болсон билээ. Барилдаанд Увс аймгийн Ховд сумын харьяат “Увснуур” дэвжээ, “ТЭЦ-3”, “Химон констракшн”-ы бөх улсын арслан Н.Батсуурь түрүүлж, Архангай аймгийн Хашаат сумын харьяат “Бөхбилэгт” дэвжээ, Уулын баяжуулах “Эрдэнэт” үйлдвэрийн “Хангарьд” спорт хороо, “Ажнай” корпорацийн бөх, улсын заан Ч.Санжаадамба үзүүрлэсэн юм. Харин их шөвөгт Увс аймгийн Баруунтуруун сумын харьяат "Хилчин" спорт хороо, "Увснуур" дэвжээ, "Монголросцветмет" нэгдлийн бөх улсын аварга С.Мөнхбат, Ховд аймгийн Чандмань сумын харьяат ОБЕГ-ын “Аврагч” спорт хорооны бөх улсын харцага Б.Пүрэвсайхан нар шалгарсан. Энэхүү барилдааны дараа улсын арслан Н.Батсуурьт үзэгчид "эрүүгийн хэрэг" үүсгэсэн "баримт"-ыг доор танилцуулж байна.