Монголын үндэсний олимпийн хорооны "Бөртэ Чоно-2018" тэргүүн дээд шагнал гардуулах ёслол өнгөрсөн долоо хоногт болж шилдгүүдээ тодруулсан. Энэ арга хэмжээний үеэр өнгөрөгч оны шилдгийн шилдэг эрэгтэй тамирчнаар жүдоч Л.Отгонбаатар, шилдэг эрэгтэй тамирчнаар Э.Цэндбаатар (бокс) Ө.Дүүрэнбаяр (жүдо), харин шилдэг эмэгтэй тамирчнаар О.Насанбурмаа (чөлөөт бөх), Г.Нандинзаяа (буудлага), шилдгийн шилдэг эмэгтэй тамирчнаар Монгол Улсын 11 удаагийн аварга, боксчин М.Нандинцэцэг шалгарсан. М.Нандинцэцэг энэ онд Азийн наадмаас хүрэл, Дэлхийн аварга шалгаруулах тэмцээнээс мөн хүрэл медаль хүртэж, ДАШТ-ээс медаль авсан Монголын анхны эмэгтэй боксчин болсон юм. Тэрбээр мөн  “Бөртэ Чоно-2018" ёслолын шилжин явах цомын эзнээр тодорсон билээ.

Тэгвэл эл шагнал гардуулах ёслолын дараа Биеийн тамир, спортын газрын дарга, гавьяат тамирчин Ц.Шаравжамц өөрийн цахим хуудаснаа дараах бичвэрээ нийтэлжээ. Тэрбээр “Ирэх жилээс Биеийн тамир, спортын газар шинэ жилээ өргөжүүлж спортын салбарынхаа шилдгүүдийг олимпийн болон олимпийн бус эрүүл болон пара, оюуны, мэргэжлийн гэж ялгахгүйгээр шалгаруулахгүй бол болохгүй шинжтэй байна. Биеийн тамир, спортын газрын шигшээ багийн алба, холбоодын гаргасан амжилтаар Олимпийн хороо шоудаад байгаа нь онцгүй санагдаж байна шүү. Ядаж шударга үнэлж, шоудвал дуугүй өнгөрөх байлаа. Энэ жилийн хувьд шилдгийн шилдэг тамирчид энэ хоёр байсан гэж бодож байна. Миний бодол учраас санал нийлэхгүй хүн байвал сайхан шүүмжилж болно шүү” хэмээгээд “Рио 2016" паралимпийн наадмын хүрэл медальт, гавьяат тамирчин, Э.Содномпилжээ болон дэлхийн дөрвөн удаагийн аварга Г.Угалзцэцэг нарын зургийг постолжээ.

Паралимпийн наадмын хүрэл медальт, гавьяат тамирчин, Э.Содномпилжээгийн хувьд энэ оны хоёрдугаар сард Арабын нэгдсэн Эмират улсын Дубай хотод болсон Пара пауэрлифтингийн Дэлхийн цомын АШТ, өнгөрсөн есдүгээр сард Япон улсын Китакюүшюү хотод болсон Пара пауэрлифтингийн Азийн аварга шалгаруулах тэмцээнд түрүүлсэн. Харин олон улсын хэмжээний мастер Г.Угалзцэцэг энэ сард Тайландад болсон Бодибилдинг фитнессийн дэлхийн аварга шалгаруулах тэмцээнд хоёр төрөлд аваргалсан билээ.

Дашрамд дуулгахад, Хөвсгөл аймгийн ИТХ-аас нутгаас нь төрөн гарсан бодибилдинг, фитнессийн тамирчин, дэлхийн дөрвөн удаагийн аварга, олон улсын хэмжээний мастер Г.Угалзцэцэгийг Монгол Улсын гавьяат тамирчинд тодорхойлжээ.

---

	Ц.Шаравжамц: Энэ жилийн шилдгийн шилдэг тамирчид Г.Угалзцэцэг, Э.Содномпилжээ байсан
Үзсэн: 4370	Mongolian National Broadcaster