Шууд Chart

“Төсвийн зарлага ба санхүүгийн хариуцлага” үнэлгээний тайланг танилцууллаа

2021-10-09 07:00:11

Дэлхийн Банк Монгол Улс дахь “Төсвийн зарлага ба санхүүгийн хариуцлага (ТЗСХ)”-ын хоёр дахь үнэлгээг 2020 оны 12 дугаар сараас 2021 оны 6 дугаар сарын хооронд  гүйцэтгэж тайланг албан ёсоор өчигдөр цахим хэлбэрээр танилцууллаа.

Арга хэмжээг нээж Сангийн яамны Төрийн нарийн бичгийн дарга С.Наранцогт, Дэлхийн Банкны Монгол Улс дахь суурин төлөөлөгч Андрей Михнев, Европын Холбооноос Монгол Улсад суугаа Төлөөлөгчийн газрын Хамтын ажиллагааны дарга Пьер-Ив Люка нар үг хэлсэн бөгөөд Сангийн яам, Үндэсний аудитын газар, Төрийн өмчийн бодлого, зохицуулалтын газрын нийт 150 гаруй албан хаагч хамрагдлаа.

Дэлхийн банк  Монгол улсын анхны үнэлгээг 2015 онд хийж байсан бол хоёр дахь  удаагийн үнэлгээг 1/төсвийн найдвартай байдал; 2/төсөв, санхүүгийн ил тод байдал; 3/хөрөнгө, өр төлбөрийн удирдлага; 4/бодлогод суурилсан төсвийн стратеги болон төсөвлөлт; 5/төсвийн гүйцэтгэлийг урьдчилан таамаглах ба хяналт тавих; 6/нягтлан бодох бүртгэл ба тайлагнал;  7/хараат бус хяналт, аудит гэсэн ерөнхий долоон бүлэгт хамаарах 31 үзүүлэлтээр үнэлсэн байна. Энэ удаагийн үнэлгээ нь 2015 оноос хойш манай улсын төсөв, санхүүгийн удирдлагын тогтолцоонд гарсан ахиц дэвшлийг тодорхойлж байгаа бөгөөд тайланд дурдсанаар нийт 12 үзүүлэлтийн оноо өмнөх үнэлгээний түвшнээс дээшилсэн байна.

Сүүлийн гурван жилийн хугацаанд төсөв санхүүгийн тогтолцоог сайжруулах чиглэлээр авч хэрэгжүүлсэн арга хэмжээ, тухайлбал, төсвөөс гадуурх харилцааг хязгаарласан, төсвийн сахилга батыг сайжруулсан, татвар төлөгчийн бүртгэлийг сайжруулж татвар төлөх үйл ажиллагааг хялбаршуулсан, мөнгөн хөрөнгийн болон өрийн удирдлагыг сайжруулсан, төсвийн төлөвлөлт болон гүйцэтгэлийн хоорондын зөрүүг багасгасан,  цалин хөлсний төсөвлөлтийг боловсронгуй болгосон, түүнчлэн төсөвт хийдэг хөндлөнгийн аудитын гүйцэтгэлийг сайжруулсан  зэрэг нь  үнэлгээний оноог өсгөхөд нөлөөлжээ.

Эх сурвалж: Сангийн яам


“Төсвийн зарлага ба санхүүгийн хариуцлага” үнэлгээний тайланг танилцууллаа  
Үзсэн: 445 Mongolian National Broadcaster  

Анхааруулга:

Та одоогоор сэтгэгдэл үлдээх боломжгүй байна.
MNB.mn сайтын редакц
Утас: 70127055

Бидэнтэй нэгдээрэй