Дэлхийн шатрын 44 дүгээр олимпиад долоодугаар сарын 26-наас 8 дугаар сарын 10-нд Бүгд найрамдах Энэтхэг улсын Ченнай хотноо болж байна. Дэлхийн шатрын 44 дүгээр олимпиадын дөрөвдүгээр өргийн тоглолтууд өчигдөр болсон.

Дөрөвдүгээр тойрогт Монголын багийн нөөц тоглогч С.Ган-Эрдэнэ, Д.Мөнхзул нар тоглосон байна. Эрэгтэй баг дөрөвдүгээр тойрогт Дэлхийн аварга Магнус Карлсенаар удирдуулсан Норвегийн шигшээтэй тоглолоо. Ийн Норвегийн багтай тэнцсэн бөгөөд дөрөвдүгээр тойргийн тоглолтыг дэлхийн шатрын холбооны мастер Г.Амартүвшин өнжсөн байна. Дөрвөн тойргийн дараа эрэгтэй шигшээ баг 2 хожил, 2 тэнцээтэй зургаан оноогоор 45 дугаар байрт бичигдэж байна.

Харин эмэгтэй баг 2021 оны рапид тоглолтын дэлхийн аварга Б.Ассаубаева тэргүүтэй Казахстаны шигшээ багтай дөрөвдүгээр тойрогт оноолт таарч 1 дүгээр ширээнд суусан их мастер А.Энхтуул, 3 дугаар ширээнд суусан олон улсын мастер Т.Мөнхзул нар тэнцэж, 2 дугаар ширээнд тоглосон олон улсын мастер Б.Баярмаа харилцан довтолсон өрөгт хожигдол хүлээж, энэ удаагийн олимпиадад нөөц тоглогчоор оролцож байгаа дэлхийн шатрын холбооны мастер Д.Мөнхзул динамик өрөгт өрсөлдөгчөө хожиж чухал оноо авлаа. Эмэгтэй багаас дөрөвдүгээр өргийн тоглолтыг дэлхийн шатрын холбооны дэд мастер Б.Мөнгөнзул өнжжээ. Ийн Монголын эмэгтэй шигшээ баг 3 хожил, 1 тэнцсэн дүнгээр нийт 7 оноотой 9 дүгээр байрт бичигдэж байна.

Сонирхуулахад, тавдугаар тойрогт Монголын эрэгтэй баг Чех, эмэгтэй баг Германы шигшээ багтай оноолт таарчээ. Дэлхийн шатрын 44 дүгээр олимпиадын тавдугаар өргийн тоглолтууд өнөөдөр Улаанбаатарын цагаар 17:30 цагт эхэлнэ.