“Наньжин-2014” залуучуудын II наадмын охидын 10 метрийн урт бууны дасгалд өрсөлдсөн манай тамирчин С.Ангирмаа VIII байрт шалгарсан амжилтыг үзүүллээ. 10 метрийн урт бууны дасгалд 20 тамирчин өрсөлдсөнөөс найман тамирчин шигшээ буудлагад шалгараад байсан юм.

С.Ангирмаа 411.9 оноогоор 7-р байраар шалгарч, шигшээд тааруухан буудаж, наймдугаар байр эзлэлээ. Энэ дасгалд Швейцарь, Сингапур, Германы тамирчин медальт байрт шалгарлаа. Буудлагын шинэчилсэн дүрмээр шигшээд шалгарсан найман тамирчин 10 сум тавьсны дараа хамгийн бага оноотой нь хасагдах дүрэмтэй. Ангирмаа сүүлийн буудлагаа 8,9 дээр онож, нийлбэр дүнгээр 80.1 авснаар наймдугаар байрт шалгарлаа. Залуучуудын наадамд өрсөлдөж байгаа Монголын таван тамирчнаас гурав нь тэмцээнээ дуусгаж, жүдогийн Хулан VII, буудлагын С.Ангирмаа VIII байрт шалгарлаа. Буудлагын төрөлд зургаан багц медалийн эзэд тодрох бөгөөд эхний гурван дасгалын дараагаар алтан медалийг Украин, Польш, Швейцарь улсаас, мөнгөн медалийг БНСУ, Сингапур, ОХУ-аас, хүрэл медалийг БНСУ, Франц, Германаас нэг нэг тамирчин хүртээд байна. “Наньжин-2014” залуучуудын II наадмын хоёр өдрийн дараах байдлаар 43 орон ямар нэгэн медаль хүртээд байгаагаас БНХАУ дөрвөн алт, нэг мөнгө, таван хүрэл, нийт 10 медаль хүртсэн амжилтаар тэргүүлж байгаа бол ОХУ (4+1+3), Унгар (4+0+2), АНУ (2+1+1), Тайвань (2+1+1) улсууд удаалж байна.