Шууд Chart

Азийн сангийн Суурин төлөөлөгчийн үүргийг түр орлон гүйцэтгэгч Сара Тэйлорыг хүлээн авч уулзлаа

2024-02-23 18:13:17

УИХ-ын Ерөнхий нарийн бичгийн дарга Д.Энхбат өнөөдөр Монгол Улс дахь Азийн сангийн Суурин төлөөлөгчийн үүргийг түр орлон гүйцэтгэгч Сара Тэйлор, Азийн сангийн Засаглалын хөтөлбөрийн захирал Г.Халиунгоо болон “Монгол Улсад хэвлэл мэдээлэл, иргэний нийгмийг бэхжүүлэх нь” төслийн зохицуулагч Л.Дэлгэрмаа нарыг хүлээн авч уулзлаа.

Уулзалтын эхэнд УИХ-ын Ерөнхий нарийн бичгийн дарга Д.Энхбат, Азийн сан нь Монгол Улс ардчилсан тогтолцоонд шилжсэнээс хойших 30 гаруй жилийн хугацаанд засаглалыг сайжруулах, уур амьсгалын өөрчлөлтийн нөлөөг сааруулах, жендэрийн эрх тэгш байдлыг хангах, авлигатай тэмцэх үйл ажиллагааг эрчимжүүлэх чиглэлээр үр дүнтэй ажлуудыг зохион байгуулж ирсэнд талархал илэрхийллээ. Тэрбээр, Монгол УИХ-ын Тамгын газар, Азийн сантай хамтран 2017 онд Монгол Улсын Үндсэн хуульд оруулах нэмэлт, өөрчлөлтийн асуудлаар анхдугаар Зөвлөлдөх санал асуулгыг амжилттай зохион байгуулсныг дурдаад улмаар 2021 онд тус сантай Хамтын ажиллагааны санамж бичиг байгуулж,  хууль тогтоох үйл ажиллагаанд иргэдийн оролцоог хангах, иргэдэд парламентын боловсрол олгох, Парламентын судалгаа, сургалтын хүрээлэнгийн чадавхыг бэхжүүлэх, парламентын ил тод, нээлттэй байдлыг хангах чиглэлээр үр дүнтэй ажлуудыг хамтран хэрэгжүүлснийг онцлон тэмдэглэв.

УИХ-ын Ерөнхий нарийн бичгийн дарга Д.Энхбат, Азийн сантай цаашид хамтран ажиллах үйл ажиллагаагаа парламентын нээлттэй, ил тод байдлыг бэхжүүлэх, УИХ-ын чуулганы хуралдааны ирц, санал хураалтын мэдээллийг иргэдэд нээлттэй, хүртээмжтэй байдлаар хүргэх цахим системийг бүрэн ашиглалтад оруулах, Монгол Улсын Их Хурал Олон Улсын Парламентын Холбоотой хамтран Улсын Их Хурлаас баталж буй хууль тогтоомж, түүний үйл ажиллагаа хүний эрх, жендэрийн шалгуурыг хэрхэн хангаж байгаа талаарх өөрийн үнэлгээнээс гарсан үр дүнг хэрэгжүүлэх чиглэлд хамтран ажиллах сонирхолтой байгаагаа илэрхийллээ.

Монгол Улс дахь Азийн сангийн Суурин төлөөлөгчийн үүргийг түр орлон гүйцэтгэгч Сара Тэйлор, Азийн сан, УИХ-ын Тамгын газар өнгөрсөн хугацаанд нягт хамтран ажиллаж, Азийн сангийн үйл ажиллагааг дэмжиж ирсэнд талархал илэрхийлээд Азийн сангийн зүгээс УИХ-ын Тамгын газартай байгуулсан Хамтын ажиллагааны санамж бичгийн хүрээнд хэрэгжсэн ажлуудыг өндрөөр үнэлдэг бөгөөд цаашид үргэлжлүүлэн хамтран ажиллах сонирхолтой байгаагаа илэрхийллээ.

Тэрбээр, Монгол Улс ардчилсан тогтолцоонд шилжиж, ардчилсан шинэ Үндсэн хуулиа баталснаас хойш анх удаа УИХ-ын гишүүдийнхээ тоонд өөрчлөлт оруулж, УИХ-ын ээлжит сонгуулиар 126 гишүүнийг сонгох түүхэн сонгууль удахгүй болох гэж байна. Энэ цаг үед УИХ-ын Тамгын газар бэлтгэл ажлыг хангах улмаар шинэ бүрэлдэхүүнтэй Улсын Их Хурал бүрдсний дараа шинээр дэвшүүлж буй бодлого, дүрэм журмыг хэрэгжүүлэхэд том сорилт тулгарна. Иймд энэ чиглэлд Азийн сан бүхий л талаар дэмжиж, хамтран ажиллах болно гэлээ.

УИХ-ын Ерөнхий нарийн бичгийн дарга Д.Энхбат, удахгүй болох УИХ-ын ээлжит сонгуулиар 126 гишүүн бүхий парламент бүрэлдэж, Монгол Улс парламентын ардчиллын хувьд цоо шинэ үеийг эхлүүлнэ. Ийм цаг үед Азийн сангийн дэмжлэг, санал, зөвлөгөө манай улсын парламентын өөрчлөлт, шинэчлэлтэд үнэтэй хувь нэмэр оруулна гэдэгт итгэлтэй байгаагаа илэрхийллээ хэмээн УИХ-ын Хэвлэл мэдээлэл, олон нийттэй харилцах газраас мэдээлэв.


Азийн сангийн Суурин төлөөлөгчийн үүргийг түр орлон гүйцэтгэгч Сара Тэйлорыг хүлээн авч уулзлаа  
Үзсэн: 478 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй