Шууд Chart

Израил болон Иран улс НҮБ-ын Аюулгүйн зөвлөлийн хуралдааны үеэр нэг нэгнээ буруутгав 

2024-04-16 09:56:08

Иран, Израилын хооронд эрс хурцадсан сөргөлдөөний асуудлаар НҮБ-ын  Аюулгүйн зөвлөл ням гарагт шуурхай хуралдсан.

Израилын хүсэлтээр болсон энэ хуралдаан дээр НҮБ болон бусад олон орны зүгээс хоёр талыг дээд зэргээр хүлээцтэй байхад уриалсан.

Иран, Израил улсууд харин бие биеэ эрс ширүүн буруутгаж байсан байна. Үүний зэрэгцээ Европын нисэхийн аюулгүй байдлын агентлаг Израил болон Ираны дээгүүр нислэг үйлддэг агаарын тээврийн компаниудад сонор сэрэмжтэй байх зөвлөмжийг хүргүүлжээ.

Өнгөрөгч бямба гарагийн шөнөөс Иран улс Израил руу нисгэгчгүй онгоцууд болон пуужингийн өргөн довтолгоо явуулж, үүнийгээ энэ сарын 1-нд Сири дэх Элчин сайдын яам руу нь цохилт өгсний хариу ажиллагаа гэж мэдэгдсэн.

Израил Иранд хариу ажиллагаа явуулах эсэхээ хэлэлцэж байгаа гэдэг мэдээлэлтэй байгаа үед НҮБ-ын Ерөнхий нарийн бичгийн дарга Антонио Гутерриш “Ойрх Дорнодод олон талбарт цэргийн хямрал мөргөлдөөн үүсгэж болзошгүй аливаа ажиллагаанаас зайлсхийхийг нэн чухал гэж мэдэгдсэн. Мөн Ойрх Дорнод төдийгүй ер нь дэлхий ертөнц дахин дайн хямрал гарахыг дааж хүчрэхгүй, дээд зэргээр тэвчээр хүлээц гаргах цаг болсон” гэдгийг цохон мэдэгджээ.

Харин Израилаас НҮБ-д суугаа байнгын төлөөлөгч Гилад Эрдан “Ираны дайралт байж болох бүх зааг шугамаас хэтэрсэн, хууль ёсны хариу ажиллагаа хэрэгжүүлэх эрх нь Израил улсад бий” гэж анхааруулсны дээр Ираны зэвсэгт хүчний элит хүчин буюу хувьсгалт цэргийн корпусыг террорист байгууллагын жагсаалтад оруулахыг уриалж, хэтэрхий оройтоогүй дээр Иран боломжит бүх хориг тогтооход уриалжээ.

НҮБ дахь Ираны байнгын төлөөлөгч Амр Саеид Иравани харин өөрийн улсын ажиллагааг НҮБ-ын дүрмийн 51-р заалтын дагуу, батлан хамгаалах эрхээ хэрэгжүүлсэн хэрэг, Иран улс бүс нутгийн хямралыг дэвэргэх болоод даамжруулах санаа агуулаагүй гэж мэдэгджээ.

Энэ зуур Израилын дайны цагийн Засгийн газар Иранд хариу ажиллагаа явуулах эсэх асуудлыг хэлэлцсэн боловч яг хэзээ, ямар цар хүрээтэй ажиллагаа байх тухайд нэгдсэн зөвшилцөлд хүрээгүй гэдэг мэдээллийг "Ройтерс" уламжилсан байна.

Үүний зэрэгцээ Европын нисэхийн аюулгүй байдлын агентлаг Израил болон Иран улсын дээгүүр нислэг үйлддэг агаарын тээврийн бүх компанид сэрэмжтэй байх зөвлөмж хүргүүлсэн, болзошгүй эрсдэлийг үнэлэх үүднээс нөхцөл байдлыг анхааралтай ажиглаж байгаа гэдгээ мэдэгджээ. 

Нийтэлсэн: Moнголын мэдээ

Израил болон Иран улс НҮБ-ын Аюулгүйн зөвлөлийн хуралдааны үеэр нэг нэгнээ буруутгав   
Үзсэн: 365 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй