“Нүүдэлчний мэдлэгийн Инж төв” НҮТББ нь ЮНЕСКО-ийн ивээл дор “Нүүдлийн соёл иргэншлийг судлах олон улсын хүрээлэн”, “Наро Банчэн хутагт  сантай хамтран “Нүүдлийн соёлт Монгол” соёлын өдрүүдийг Бүгд Найрамдах Франц Улсад Хүн төрөлхтний 33 дугаар зуны Олимпыг тохиолдуулан зохион байгуулж байна.

Соёлын олон талт байдал, нүүдлийн соёл иргэншлийн өв соёлыг сурталчлах, түгээн дэлгэрүүлэх “Нүүдлийн соёлт Монгол” соёлын өдрүүдийг Францын Сен-эт-Марн  дахь Manoir de Villefermoy хэмээх  аялал жуулчлалын тэргүүлэх бүст байрлах байгалийн болон түүх соёлын чухал ач холбогдол бүхий үзэсгэлэнт шилтгээнд зохион байгууллаа.

Тус соёлын өдрүүдийн хүрээнд Юнеско-д бүртгэгдсэн Монголын ардын урлагийн болон соёлын өвүүдийн талаарх танилцуулга, уртын болон ардын дуу, бие биелгээ зэрэг урлагийн тоглолтуудыг толилуулжээ.

Мөн түүнчлэн VII дүрийн Наро Банчэн хутагтын Монгол,Энэтхэг, Вьетнам улсуудад амжилттай зохион байгуулагдсан Майнд рефлекшн буюу “Сэтгэлийн тусгал” форумыг соёлын өдрүүдийн хүрээнд хийж Наро Банчэн хутагтын “Сэтгэлийн амар амгалан” айлдвар, форумын сургагч, багш нарын “Шинэлэг амьдралын хэв маягийг дэмжих нүүдэлчдийн 18 чадамж” сэдэвт сургалт, сүүлийн үед нийтэд ихээхэн түгээд байгаа Майндфүлнэсс буюу дурьдал ойр агуулах бясалгал зэргийг тусгасан нь “Нүүдлийн соёлт Монгол” соёлын өдрүүд төслийн арга хэмжээний бас нэгэн онцлох зүйл, Франц улсад амьдарч буй Монголчуудын талархлыг хүлээсэн зүйл байлаа.

Энэ соёлын өдрүүдийг зорьж 500-800км замыг туулан ирсэн хүмүүс ч байсан юм. “Нүүдлийн соёлт Монгол” соёлын өдрүүдийн арга хэмжээ 2024 оны наймдугаар сарын 3-нд Францын Рэннэс хотод мөн зохиогдоно.

Цаашид “Нүүдлийн соёлт Монгол” соёлын өдрүүд төслийг нүүдэлчний мэдлэгийн инж төв  НҮТББ нь ЮНЕСКО-ийн ивээл дор Нүүдлийн  соёл иргэншлийг судлах олон улсын хүрээлэн, Наро Банчэн хутагт сантай хамтран олон улс оронд зохион байгуулахаар төлөвлөж байгаа ажээ.