Афганистаны эрх баригчид Пакистан улс тус улсын нутаг дэвсгэрт дахин агаарын цохилт өгсний улмаас 13 хүн амиа алдаж, 14 хүн шархадсан гэж мэдэгдлээ.

Талибаны Засгийн газрын хэвлэлийн төлөөлөгч Забихулла Мужахидын мэдээлснээр агаарын цохилт Хост, Кунар, Пактика мужуудыг онилсон байна. Уг халдлагын улмаас 11 хүүхэд, нэг эмэгтэй, нэг өндөр настан амь үрэгджээ.

Одоогоор Пакистаны талаас энэхүү мэдээлэлд албан ёсны тайлбар хийгээгүй байна.

Пакистан, Афганистан хоёр улсын харилцаа сүүлийн саруудад эрс хурцадсан бөгөөд хоёрдугаар сарын сүүлчээр Афганистан Пакистаны нутаг дэвсгэрт хариу цохилт өгснөөс хойш хилийн бүсэд мөргөлдөөн үргэлжилж, олон зуун хүн амь насаа алдаад байгаа юм.

Пакистан улс Афганистаныг өөрийн нутаг дэвсгэрт халдлага үйлддэг зэвсэгт бүлэглэлүүдийг, ялангуяа “Техрик-и-Талибан Пакистан” (TTP) бүлэглэлийг орогнуулж байна хэмээн буруутгадаг. TTP нь Афганистаны Талибанаас тусдаа бүтэцтэй боловч холбоотон бүлэглэлд тооцогддог байна.

Харин Кабулын эрх баригчид дээрх буруутгалыг няцааж, Афганистаны нутаг дэвсгэрийг хөрш орнуудын эсрэг ашиглуулахгүй гэсэн байр сууриа удаа дараа илэрхийлжээ.