АНУ-ын Батлан хамгаалахын сайд Эштон Картер Өмнөд Хятадын тэнгист Хятад улс түрэмгий бодлого явуулж байна гэж мэдэгдсэн талаар "Ройтерс" агентлаг уламжилж байна. Хятад улс тус бүс нутгийн газар нутгийн маргаантай аралд газар-агаар ангиллын пуужин байрлуулсныг эсэргүүцэн, энэ бүсийг цэрэгжүүлэхээ зогсоох хэрэгтэй гэх байр сууриа Эштон Картер илэрхийлжээ. Энэ мэдэгдэл нь олон улсын дэглэмтэй бүс нутгийн энх тайван, тогтвортой байдлыг хамгаалахад АНУ ихээхэн ач холбогдол өгч байгааг нотлон харууллаа гэж "Ройтерс" агентлаг мэдээлж байна.

Өмнөд Хятадын тэнгисийн бүс нутгаар жил бүр дэлхийн нийт ачаа тээврийн 30 орчим хувь нь дамжин өнгөрдөг юм. Үүнээс гадна АНУ-ын Батлан хамгаалахын сайд Орос, Хятадын эрх баригчид цахим ертөнцөд тавих хяналтаа улам бүр нэмэгдүүлж, мөн цахим халдлагыг төрөөс санхүүжүүлж байна гэж ярьсныг "Ройтерс" агентлаг уламжиллаа. Эдгээр оронтой харьцуулахад АНУ хувь хүний эрх чөлөө, хувийн нууцыг хадгалан хамгаалахад ихээхэн ач холбогдол өгч байгааг Эштон Картер онцолсон байна.

Сан Бернардинод болсон халдлагыг зохион байгуулсан этгээдүүдийн гар утсан дахь мэдээллийг тайлж унших асуудлаар АНУ-ын Холбооны мөрдөх товчоо болон Эппл корпорацийн хооронд сүүлийн үед томоохон маргаан дэгдээд байгаа. Энэ асуудлыг үл харгалзан АНУ-ын Батлан хамгаалахын сайд улс оронд нь үйл ажиллагаа явуулж байгаа технологийн компаниуд мэдээллийн нууцлалаа сайжруулж, хэрэглэгчдийнхээ хувийн мэдээллийн аюулгүй байдлыг чандлан хамгаалахыг уриалсан юм.