Олимпийн эрх авсан сонгомол, чөлөөт бөхийн тамирчид допинг хэрэглэсэн байсныг Дэлхийн бөхийн нэгдсэн холбоо /UWW/-ноос өчигдөр албан ёсоор зарлажээ. Харамсалтай нь дараах тамирчдын дотор 53 кг-д олимпийн эрх хүртсэн ДАШТ-ий мөнгөн медальт, Монгол Улсын тамирчин Э.Сумъяа багтсан байна. Түүнийг Казахстаны тэмцээнд түрүүлж олимпийн эрх  авахдаа дээрх хориглосон бэлдмэлийг хэрэглэсэн гэж үзжээ.

Шинжилгээнээс нь допинг илэрсэн тамирчдын нэрийг танилцуулъя.  

Чөлөөт бөх

Эрэгтэй:
Польш Улсын бөх 65 кг-ын жингийн тамирчин Магомедмурад Гаджиев, Украины Андрей Кватковскый нарын шинжилгээнээс сөрөг хариу гарч Олон улсын олимпийн хороо тус улсын олимпийн эрхийг Гүржийн Зураби Якобишвили, Армений Дэвид Сафарян нарт шилжүүлжээ.

Гүржийн бөх эхний эрх олгох тэмцээнээр Болгарын Борис Новачковийг хожиж эрхээ аль хэдийнэ авчихсан байсан. Новачков сүүлийн эрх олгох тэмцээнд түрүүлж эрхээ авсан. Тиймээс нэг эрх нь сүүлчийн тэмцээнд гуравдугаар байр эзэлсэн АНУ-ын Франк Молинара руу шилжсэн байна.  

125 кг-ын жингийн Украины тамирчин Аллен Засеев, Беларусын Юсуп Жалилау нарын эрхийг хурааж, Киргизстан, Унгарын бөхчүүдэд олгов.

Эмэгтэй:         

Монгол Улсын тамирчин, 53 кг-ын жингийн өрсөлдөгч Э.Сумьяагийн шинжилгээгээр positive буюу хориотой бэлдмэл хэрэглэсэн хэмээн дүгнэгдсэн тул эрхийг нь хурааж, Энэтхэгийн тамирчинд олгохоор болжээ.  

58 кг-ын жингийн тамирчин Украины бөх Оксана Хершэлийн шинжилгээний хариунаас мөн л Positive гарч, эрх нь Молдав Улсын бөх Мариана Чедиравад шилжинэ.

Сонгомол бөх:

85 кг-ын жингийн тамирчин Киргизийн бөхийн эрхийг Энэтхэг улс руу шилжүүллээ.

Энэ талаар Монгол Улсын гавьяат тамирчин, чөлөөт бөхийн гавьяат дасгалжуулагч, чөлөөт бөхийн ДАШТ-ий мөнгөн медальт, Үндэсний бөхийн улсын заан З.Дүвчин, МЧБХ-ны ерөнхий нарийн бичгийн дарга О.Баянмөнх нараас тодруулга авах гэсэн боловч утас нь холбогдсонгүй.