“Найрсаг Улаанбаатар” хөтөлбөрийн хүрээнд зохион байгуулах “Улаанбаатар-2016” олон улсын гүйлтийн тэмцээн ирэх зургадугаар сарын 4-нд болно.

Энэ жилээс оролцогчдыг онлайнаар бүртгэж байгаа тул сонирхсон хүмүүс http://ub-marathon.ub.gov.mn хаягаар мэдүүлэгээ энэ сарын 30 хүртэл өгөх ёстой юм байна.  

Түүнчлэн дээрх өдрөөс өмнө энгэрийн дугаараа авч баталгаажуулсан байх шаардлагатай тул оролцогч 1.5 км, таван км-т гүйхээр бүртгэлээ баталгаажуулсан бол энгэрийн дугаараа дүүргүүдийн Биеийн тамир, спортын хорооноос, 10, 21, 42 км-т гүйх бол энгэрийн дугаар, футболк, малгай, уут, чип зэргээ Нийслэлийн Биеийн тамир, спортын газраас авах юм байна.

“Улаанбаатар-2016” олон улсын гүйлтийн тэмцээн марафон болон сонирхогчдын гүйлт гэсэн хоёр ангилалд болно. Марафоны ангилалд 18-аас дээш насны тамирчид хагас марафон /21 км 095 метр/, бүтэн марафон /42 км, 195 метр/ гүйлтэд оролцоно.

Сонирхогчид дөрвөн насны ангиллаар дараах гурван зайнд уралдана.

• 5000 м    

12-17, 18-35, 36-54, 55-аас дээш нас /эр, эм, зөвхөн сонирхогчдын дунд/

• 10000 м       

  18-аас дээш нас /эр, эм, зөвхөн сонирхогчдын дунд/

• 1.5 км 

Гэр бүлийн гүйлт, хөгжлийн бэрхшээлтэй иргэд (тэргэнцэртэй, хараагүй)

Сонирхуулахад Монгол Улсын Засгийн газрын 2014 оны 376 дугаар тогтоол, Нийслэлийн Засаг даргын 2015 оны А/121 дүгээр захирамжаар "Найрсаг Улаанбаатар" хөтөлбөрийн хүрээнд "Улаанбаатар Марафон" олон улсын хоёр дахь удаагийн гүйлтийг 2015 оны зургадугаар сарын 6-нд амжилттай зохион байгуулсан. Энэхүү гүйлтэнд манай улсынхаас гадна ОХУ, БНХАУ, Бутаны Вант улс, Герман, Япон, Белги, Англи, Итали, Швейцарь, Турк, Беларусь зэрэг 18 орны 90 тамирчин нэгдсэн билээ.