Чөлөөт бөхийн насанд хүрэгчдийн ДАШТ наймдугаар сарын 21-26-нд Францын нийслэл Парист болно.

Эрэгтэйчүүдийн 50, эмэгтэйчүүдийн 29 дэх удаагийн тэмцээнд оролцох Монгол Улсын баг тамирчид ДАШТ-ий бэлтгэлээ Эрдэнэтийн Олимп баазад хийж эхэллээ.

Тэднийг тус холбооны ахлах дасгалжуулагч Б.Баттулга, Ц.Баярсайхан, дасгалжуулагч ОУХМ Б.Батзориг, Ө.Ууганбаяр нар удирдан явуулж буй.

Монголын чөлөөт бөхийн холбоо ДАШТ-д оролцох баг тамирчдаа “Аса” циркийн гадна талбайд сонгон шалгаруулах тэмцээнээ хийж бүрэлдэхүүнээ сонгосон билээ. 

Эрэгтэйчүүдийн

• 57 кг-д Гавьяат тамирчин Э.Бэхбаяр (Хангарьд),
• 61 кг-д ОУХМ Т.Түвшинтулга (Аваргууд академи),
• 65 кг-д ОУХМ Н.Лхамгармаа,
• 70 кг-д Гавьяат тамирчин Г.Мандахнаран (хоёул Алдар),
• 74 кг-д ОУХМ Д.Гомбодорж (Сүлд),
• 86 кг-д ОУХМ О.Үйтүмэн (Алдар),
• 97 кг-д ОУХМ Ө.Батзул,
• 125 кг-д ОУХМ Н.Золбоо (хоёул Хүч) нар дэлхийн аваргад зодоглоно. 

Эмэгтэйчүүдийн

• 48 кг-д ОУХМ Э.Нарангэрэл (Хангарьд),
• 53 кг-д Гавьяат тамирчин Д.Отгонцэцэг (Хасу-Мегастарс),
• 55 кг-д ОУХМ Э.Даваачимэг (Хилчин),
• 58 кг-д ОУХМ А.Батцэцэг (Хасу-Мегастарс),
• 60 кг-д ОУХМ Б.Шоовдор (Хилчин),
• 63 кг-д ОУХМ П.Орхон (Алдар),
• 69 кг-д Гавьяат тамирчин О.Насанбурмаа (Хангарьд),
• 75 кг-д спортын мастер Г.Уртнасан (Хилчин) нар халз барилдааны ялагч болсон юм.