Францын нийслэл Парис хотноо чөлөөт бөхийн насанд хүрэгчдийн ДАШТ хэдхэн хоногийн өмнө болж, манай улсаас ОУХМ П.Орхон алтан медаль хүртсэн юм. Иймд түүнийг өнөөдөр 04:30 цаг “Чингис хаан” олон улсын нисэх онгоцны буудалд буухад нь тосон авч цөөн асуултад хариулт авлаа.  

-ДАШТ-ий алтан медальтай эх орондоо ирсэнд баяр хүргэе?

-Баярлалаа. Надад туслаж дэмжсэн багш, гэр бүл болон сэтгэлзүйгээр маш их дэмжсэн үзэгчиддээ баярлалаа.

-Таныг ялалт байгуулахад Францанд суугаа Монголчууд “Mongolia, Mongolia” гээд л хашгарч байгаа нь маш тод сонсогдож байсан ...

-Харин тийм. Намайг хүрэл медалийн болзол хангаснаас хойш тэр чимээ улам их мэдрэгдсэн. Мөн маш их эрч хүч хайрласан.

-Та анх удаа энэ том тэмцээнд өрсөлдөж, түрүүллээ. Өөртөө хэр итгэлтэй байсан бэ?

-Би дэндүү итгэлтэй байсан. Тэгээд ч 2013 онд залуучуудын ДАШТ-ээс хүрэл медаль хүртэж байсан болохоор энэ удаа надад боломж байгаа, түүнийг алдаж болохгүй гэж хичээсэн.

-Тэгвэл хамгийн хүнд барилдаан аль хэсэгт таарсан бэ?

-Энэ тэмцээнд муу тамирчин хэзээ ч ирдэггүй болохоор бүгд л чанга байлаа. Ялангуяа Африкийн орны бөхчүүд. Гэхдээ тэднээс хамгийн хүнд нь аваргын төлөө барилдсан ДАШТ-ий алт, хүрэл медальт Украины Юлья Ткач.

-Одоо таныг ард түмэн “Токио-2020” олимпоос ямар нэгэн медаль хүртэнэ гэж бодож эхлээд байгаа болов уу ...

-Дээрх олимпод өрсөлдөх тамирчин бүр мэдээж энэ тухай бодож, мөрөөдөж, хөдөлмөрлөж байгаа. Миний хувьд энэ хүчээ хадгалж, сайн оролцохыг хичээнэ ээ.

-Ярилцсанд баярлалаа.