“Пёнчан 2018” өвлийн олимпийн XXIII наадмын нээлт өчигдөр олимпийн цэнгэлдэхэд боллоо.

Ийнхүү 17 хоногийн турш 92 орны 2925 тамирчин спортын 15 төрөлд 102 багц медалийн төлөө өрсөлдөхөөр нэг “зурхайгаас” хөдлөв.

Тэртээ 1988 оны Зуны олимпийн наадмыг зохион байгуулж байсан БНСУ-ын ард түмэн 30 жилийн дараа өвлийн олимпийн наадмыг зохион байгуулж буй.

Улаанбааатарын цагаар 19.00 цагт эхэлсэн тус олимпийн наадмын нээлт хоёр цаг орчим үргэлжилсэн юм.

Мөн энэ удаагийн наадмын нээлтэнд дэлхийн олон орны төрийн өндөр албан тушаалтхн уригдан оролцлоо.

Пёнчан хот өвлийн олимпийн наадмыг зохион байгуулсан Азийн гурав дахь хот болж байна. Өмнө нь 1972 онд Японы Саппоро, 1998 онд Нагано хотод “цагаан” олимп болсон түүхтэй.

БНСУ-ын томоохон хотын нэг болох Пёнчанд 43 мянган иргэн амьдардаг бөгөөд нийслэл Сөүл хотоос 180 км-т оршдог аж.

Олимпийн нээлт, хаалтын ёслол болох цэнгэлдэх хүрээлэн 35 мянган хүний суудалтай бөгөөд олимпийн наадмын дараа музейн зориулалттай ашиглахаар зохион бүтээжээ.

“Пёнчан-2018” өвлийн олимпийн бамбар 2017 оны арваннэгдүгээр сарын 1-нд Грекээс гарсан бөгөөд Инчоны нисэх онгоцны буудлаас Чэжү аралд хүрч, улмаар Пусанд очсоноор аялал эхэлсэн.

Олимпийн бамбар БНСУ-ын хотуудаар 101 хоногийн турш аялахдаа 7500 хүн бамбарыг буухиалж, 2018 км замыг туулжээ.