Хаваржилт хүндэрч болзошгүйтэй холбоотой улсын онцгой комиссоос Өмнөговь аймгийн долоон суманд өвс, тэжээлийг хөнгөлттэй үнээр олгохоор тогтсоны дагуу өчигдөр холбогдох сумууд руу нь ачуулав.

Өмнөговь аймгийн хэмжээнд 15 сумын 58 багт 5819 малчин өрхөд 2,6 сая толгой мал хаваржиж байна. Өвлийн саруудад нийт нутгаар бага зэргийн цасан бүрхүүлтэй, 60-65 хувь нь өвсгүй, 20-30 хувь нь дунд зэрэг 10-15 хувь нь өнөтэй, малын өвс хоолтой байсан ба өнгөрсөн хоёрдугаар сарын эхээр нийт нутгаар цочир хүйтэрч ямаа хээл хаях, дарагдах зэргээр хорогдож эхэлсэн.

Хаврын эхэн сараас эхлэн нийт нутгаар цасгүй, салхи шуургатай байсан нь мал ихээр муудах, хорогдох шалтгаан болж байна. Өөр аймгийн зургаан суманд 58 өрхийн 40.9 мянган толгой мал оторлож байна.

Аймаг, сумын аюулгүй нөөцөд Засгийн газрын 181 сая төгрөг болон орон нутаг Говийн оюу хөгжлийг дэмжих сангийн 250,0 сая төгрөгний дэмжлэг хөрөнгөөр 784,0 тн өвс, 540,0 тн тэжээл татан нөөцөлж малчид иргэдэд худалдан борлуулсан. Мөн Монгол Улсын Засгийн газрын хоёр ч удаагийн тогтоолоор Өмнөговь аймагт нийт 400 тонн тэжээл, 450 тонн өвсийг хуваарилсныг холбогдох сумуудад нь ачуулав.

Өмнөговь аймгийн сумын өвс, тэжээлийн нөөц багасч байгаатай холбоотойгоор Мал хамгаалах сангаас сумдад өвс, тэжээл худалдан авахад зориулан ирэх зургадугаар сарын 30-ны дотор эргэн төлөх нөхцөлөөр 165,0 сая төгрөгийн зээлийг олгосон.

Мөн аймгийн аюулгүй нөөцөд татан авсан өвс дууссан тул нэмэлтээр 109 тн өвсийг татан худалдан борлуулж байна.

Өнөөдрийн байдлаар өвсний нөөц 100 тн байна. Засгийн газрын тогтоолын дагуу 2018 оны 01 сард Улсын нөөцийн салбараас 200 тн өвсийг таван сумын малчдад үнэгүй олгож, 150 тн тэжээлийг 50 хувийн хөнгөлөлттэй үнээр олгосон бол энэ сард мөн Засгийн газрын шийдвэрийн дагуу Өмнөговь аймгийн Баян-Овоо, Номгон, Хүрмэн, Гурвантэс, Сэврэй, Ноён, Булган сумдад 70 тн өвсийг үнэгүй, 15 суманд 150 тн тэжээлийг 50 хувийн хөнгөлөлттөй үнээр олгожээ.