Бага болон дунд тусгалын пуужингийн зэвсэглэлийг хорогдуулах тухай гэрээнээс АНУ гарахыг эрмэлзэж байгаа нь алдаа гэж ЗХУ-ын Ерөнхийлөгч асан Михаил Горбачев мэдэгдлээ.

“Интерфакс” агентлагт өгсөн ярилцлагадаа тэрээр “цөмийн зэвсэггүй дэлхий ертөнц”-ийг чухалчилдаг хүн бүрийг энэ гэрээг хамгаалж үлдэхийн төлөө тэмцэхэд уриалсан байна.

Түүнчлэн Германы нэлээд олон төрийн түшээ болон улстөрч түүнтэй адил байр суурьтай байна. ХБНГУ-ын Гадаад хэргийн сайд Хайко Маас Бага болон дунд тусгалтай пуужингийн зэвсэглэлийг хорогдуулах тухай гэрээнээс АНУ гарахаар санаархаж байгаа нь “харамсал төрүүлж байна” гээд “болзошгүй үр дагавруудыг нь бодолцож үзэхийг” АНУ-д ятгах болно гэдгээ амлажээ.

Энэхүү гэрээтэй холбоотой асуудлыг өнөөдөр ОХУ-ын Ерөнхийлөгч Владимир Путин, АНУ-ын Ерөнхийлөгчийн үндэсний аюулгүй байдлын зөвлөх Жон Болтон нарын уулзалтаар хэлэлцэж магадгүй. Болтон өчигдөр Москвад хүрэлцэн очсон юм.

Өмнө нь АНУ-ын Ерөнхийлөгч Дональд Трамп дунд болон бага тусгалын пуужингийн зэвсэглэлийг хорогдуулах гэрээнээс улс нь гарахаар болсныг, ОХУ уг гэрээний заалтуудыг зөрчсөнөөс үүдэлтэй гэдгээс өөр дэлгэрэнгүй тайлбар хэлээгүй юм.

1987 онд АНУ болон ЗХУ-ын хооронд байгуулсан Бага болон дунд тусгалын пуужингийн зэвсэглэлийг хорогдуулах тухай гэрээнд 500-5000 км-ийн зайд тусах хүчин чадал бүхий баллистик болон далавчит пуужингуудыг турших, хадгалах, үйлдвэрлэхийг хориглож, ийм төрлийн нэгэнт бий болсон пуужин болон харвах төхөөрөмжүүдийг устгахаар заасан юм.