АНУ цөмийн пуужингаа Европод байршуулахыг Европ дахь холбоотон улсууд нь хүлээн зөвшөөрвөл хариуг нь барина гэж ОХУ-ын Ерөнхийлөгч Владимир Путин мэдэгдлээ.

Тэрбээр энэ тухай лхагва гарагт Москвад айлчилсан Италийн Ерөнхий сайд Жузеппе Контетай уулзалт яриа хийснийхээ дараа сэтгүүлчдэд хэлсэн байна. Хэвлэлийн хурлын үеэр сэтгүүлчийн “АНУ Дунд болон бага тусгалын цөмийн пуужин устгах гэрээнээс гарсан тохиолдолд энэ нь Европод хэрхэн нөлөөлөх бол” гэсэн асуултад ОХУ-ын Ерөнхийлөгч Владимир Путин “Хэрэв АНУ пуужингаа Европод байршуулвал Оросын хариу үйлдэл үүнийх нь тусгал байх болно” гэж хариулсан байна.

Мөн “Европын улсууд АНУ-ын цөмийн пуужинг нутаг дэвсгэртээ байлгахыг зөвшөөрвөл газар нутгаа эрсдэлд оруулж, Оросын талын хариу цохилтод өртөж мэдэх юм” гэсэн агуулгатай анхааруулга өгчээ.

Өөрөөр хэлбэл, ОХУ-ын Ерөнхийлөгч Владимир Путин АНУ-ын гаргасан шийдвэрт яг ижил хариу барина гэж мэдэгдсэн байна. Энэ зуурт НАТО-гийн зүгээс ОХУ энэ гэрээг зөрчиж байж магадгүй гэдэгтэй санал нэгдэж, НАТО сөрөг арга хэмжээ авахыг урьтал болгохгүй. Гэхдээ аливаа аюул заналын эсрэг бүх холбоотон улсаа хамгаалахад бэлэн гэж НАТО-гийн Ерөнхий нарийн бичгийн дарга Иенс Столтенберг мэдэгдээд байна.

Өнөөдөр НАТО хүйтэн дайны үеэс хойших хамгийн том хэмжээний цэргийн сургууль хийх гэж байна.