Хүчлийн халдлагад өртөж хүчтэй түлэгдсэн Украйны авлигын эсрэг тэмцэгч нийгмийн зүтгэлтэн эмэгтэй нас баржээ. Өнгөрөгч долоодугаар сарын 31-нд Украйны Керсон хотод Катарена Хэндзик гэдэг энэ эмэгтэй рүү хүчил цацаж халдсаны улмаас эмэгтэй 40 хувийн түлэгдэл авч, нүд нь гэмтсэн юм.

Энэ хэрэгтэй холбогдуулан Украйн таван хүнийг баривчлаад байсан бол ням гарагт эмэгтэй нас барсны дараа тус улсын Ерөнхийлөгч Петро Порошенко эмэгтэйн амь насанд хүрсэн хүмүүст ял хүлээлгэх хэрэгтэй гэж мэдэгдсэн байна.

Одоогоор Катеринагийн үхлийн шалтгаан мэдэгдэхгүй байгаа ч цус бүлэгнэлтэй холбоотой гэсэн тайлбарыг орон нутгийн хэвлэлд бичжээ. Авлигын эсрэг идэвхтэй тэмцэгч энэ эмэгтэй Украйны Керсон хотын зөвлөлийн гишүүн байсан байна. Тэрээр нийслэл Киев хотод хэд хэдэн удаа авлигын эсрэг үйл ажиллагаа явуулж байжээ. Мөн түүнийг Оросын талыг дэмжигч салан тусгаарлахыг дэмжигчдийн эсрэг үйл ажиллагаа явуулдаг байсныг барууны хэвлэл сануулж байна.

Катерина өнгөрөгч есдүгээр сард авлигын эсрэг идэвхтэй тэмцэж, буглааг нь арилгах хэрэгтэй хэмээн видео бичлэгээ интернетэд байршуулан уриалж байсныг ч дурджээ.