Боловсрол, соёл, шинжлэх ухаан, спортын яамнаас 2018 онд “Соёлын биет бус өвийг үндэсний болон дэлхийн хэмжээнд сурталчлан алдаршуулах, түгээн дэлгэрүүлэхэд онцгой хувь нэмэр оруулсан өвлөн уламжлагчид мөнгөн шагнал олгох журам”-ыг шинэчлэн боловсруулж, Засгийн газрын 2018 оны 354 дүгээр тогтоолоор батлуулсан.

Уг журам батлагдан гарснаар соёлын биет бус өвийг үндэсний болон дэлхийн хэмжээнд сурталчлан алдаршуулах, түгээн дэлгэрүүлэхэд онцгой хувь нэмэр оруулсан нэг өвлөн уламжлагчийг тодруулан жилд нэг удаа мөнгөн шагнал олгон урамшуулан алдаршуулах боломж бүрдэж байна. Шилдгээр шалгарсан өвлөн уламжлагчид Хүндэт өргөмжлөл олгож, 30 сая төгрөгийн мөнгөн шагналаар шагнах юм.

Шагналд нэр дэвших өвлөн уламжлагч нь үндэсний болон олон улсын хэмжээнд зохион байгуулагдсан уралдаан, тэмцээнд амжилт гарган, соёлын биет бус өвийг сурталчлах, түгээн дэлгэрүүлэх чиглэлээр дотоод гадаадад зохион байгуулагдсан арга хэмжээнд идэвхтэй оролцсон байх ба өөрийн санаачилгаар соёлын биет бус өвийг чиглэлээр олон талт үйл ажиллагааг зохион байгуулж, өв соёлоо хадгалан хамгаалах, хөгжүүлэх үйлсэд манлайлан оролцож, үлгэр дууриалал болсон байх зэрэг шалгуурыг хангасан байх шаардлагатай аж.

Түүнчлэн аймаг, нийслэлийн Засаг дарга холбогдох журамд заасны дагуу соёлын биет бус өвийг өвлөн уламжлагчдыг баримт бичгийг бүрдүүлэн нэр дэвшүүлэх юм. Нэр дэвшигчдийн материалыг Соёлын өвийн үндэсний төвд хүлээн авч, хянан үзэж, шаардлагатай бол нэмэлт мэдээлэл, тодруулгыг Шинжлэх ухааны академи, ЮНЕСКО-гийн Монголын үндэсний комисс, Соёл, урлагийн их сургуулийн эрдмийн зөвлөл болон соёл, урлагийн чиглэлээр үйл ажиллагаа явуулдаг гурваас доошгүй Төрийн бус байгууллагаас санал авна.

Ийнхүү дээрх саналыг үндэслэн шаардлага хангасан нэр дэвшигчдийн материалыг Боловсрол, соёл, шинжлэх ухаан, спортын яамны дэргэдэх “Соёлын биет бус өвийн мэргэжлийн зөвлөл”-д шилжүүлэн, мэргэжлийн зөвлөлийн эцсийн санал хураалтаар шилдэг өвлөн уламжлагчийг шалгаруулан Боловсрол, соёл, шинжлэх, ухаан спортын сайдад уламжлан шийдвэрлүүлэх аж.

Харин шагнал гардуулах ёслолын арга хэмжээг жил бүрийн билгийн тооллын өвлийн сүүл сарын шинийн 25-ны өдөр товлон Монгол Улсын Ерөнхий сайд гардуулна.

Дээрх шалгаруулалтын материал хүлээн авах хугацаа энэ сарын 25-нд дуусна. Тиймээс эрхэм соёлын биет бус өвийг өвлөн уламжлагчдаа журмын дагуу бүртгүүлж, идэвхтэй оролцохыг урьж байна.