Боловсрол соёл, шинжлэх ухаан, спортын сайдын тушаалын дагуу ерөнхий боловсролын сургуулийн 1-5 дугаар ангийн сурагчдын хоёрдугаар улирлын амралт энэ сарын 22-нд эхэлнэ. Харин 6-12 анги энэ сарын 28-ныг дуустал хичээллээд амарна.

Түүнчлэн ЕБС-ийн сурагчдын хоёрдугаар улирлын амралт нэгдүгээр сарын 15-ныг хүртэл дөрвөн долоо хоног үргэлжилнэ. Гэхдээ агаарын бохирдлоос шалтгаалан нийслэлийн сурагчдын хоёрдугаар улирлын амралт илүү урт байх юм.

Тодруулбал, Улаанбаатар хотын ЕБС-ийн I-V ангийн сурагчдын хоёрдугаар улирлын амралт энэ сарын 22-ноос ирэх оны хоёрдугаар сарын 10-ныг дуустал 49 хоног үргэлжлэх юм. Харин VI-XII ангийн сурагчдын амралт энэ сарын 29-нөөс ирэх оны хоёрдугаар сарын 10-ныг дуустал зургаан долоо хоног үргэлжилнэ.

Түүнчлэн сурагчид гуравдугаар улирлын хичээлийн дундуур сар шинийн баяраар нэг долоо хоног, гуравдугаар сарын 23-наас дөрөвдүгээр сарын 14-нийг дуустал гурван долоо хоног амрах юм байна. Гэхдээ газар зүйн бүслүүр, цаг уурын онцлог, мал төллөх хугацаанаас хамааран тус улирлын амралтыг нэг долоо хоногийн өмнө эхэлж болох аж.

Харин нийслэлийн сурагчдын гуравдугаар улирлын амралт дөрөвдүгээр сарын 6-14-нийг дуустал нэг долоо хоног үргэлжлэх аж.

Зуны амралтын хувьд I-II анги зургаадугаар сарын 1, III-V анги 8, VI-XII ангийн сурагчид 15-наас эхэлж амрах аж.