Америкийн CBS телевизийн шинэ шоу нэвтрүүлэг болох “The world’s best” шоуг реппэр, хөгжмийн продюсер О.Баярсайхан буюу Рокит Бэй шүүж байгаа талаар бид өмнө нь мэдээлсэн. Үндсэн гурван шүүгчдээс гадна 38 орны өөрийн салбартаа хүлээн зөвшөөрөгдсөн 50 мэргэжилтэн “дэнслэх” тус шоуны тайзнаа дэлхийн шилдгийн шилдэг авьяастнууд өөрсдийн үзүүлбэрээ үзүүлж, цор ганц ялагч нэг сая ам.долларын эзэн болно. Тэгвэл тус шоунд “Авьяаслаг Монголчууд-2” шоуны ялагч, дуучин О.Энх-Эрдэнэ оролцож, үндсэн гурван шүүгч болон 49 мэргэжилтнийг алмайруулж, дараагийн шатанд өрсөлдөх эрхээ авсан билээ.

Дуучин О.Энх-Эрдэнийн хувьд продюсер Андрив Лэйнтэй гэрээ байгуулж, хамтран ажиллаж эхэлжээ. Тэрбээр "She ain't no love song", "Honky tonk сountdown" зэрэг  дуунаас бүрдсэн анхны бие даасан цомгийн бэлтгэл ажлаа базааж байна. Түүний дууны үг, ая, найруулгыг "Wishbone” студийн баг хариуцан ажиллаж байгаа. Хүчирхэг хоолойтой дуучин О.Энх-Эрдэнэ “Wake up with you” дууныхаа клипийг сонсогчдодоо хүргэсэн бол саяхан "She ain't no love song" дуугаа цацлаа.