Венесуэл улсад эсэргүүцэгчдийн эсрэг хүч хэрэглэсэн тохиолдолд АНУ шалтаг гаргаж, цэргээ оруулж ирнэ гэж Венесуэлийн Төрийн тэргүүн Николас Мадуро тавдугаар сарын 1-нд дэмжигчдэдээ үг хэлэх үеэрээ мэдэгджээ.

Дөрөвдүгээр сарын 30-нд төрийн эргэлт хийх гэж оролдсон сөрөг хүчнийхний гол зорилго нь венесуэлчүүдийг өөр хооронд нь хагаралдуулах санаачилга байсан гэж тэрбээр хэлсэн байна.

“Тэд биднээр иргэний дайн хийлгэхийг хүсч байна. Хэрвээ бид байгаа бүх танк, хуягт машин, тусгай хүчнээ илгээвэл юу болох байсан бэ гэж би асууя. Тэгвэл венесуэлчүүд хоорондоо дайтаж, харин Вашингтон баярлаж, Боливарын газар нутгийн эзлэхийн тулд цэргийн дайралтаа эхлүүлэх байсан” гэсэн Николас Мадурогийн үгийг “РИА Новости” агентлаг дамжуулжээ. Тиймээс төрийн эргэлт хийхийг дахин оролдвол венесуэлчүүдийг гудамжинд гарахад бэлэн байхыг уриалсан байна.

Эргэн сануулахад, дөрөвдүгээр сарын 30-нд Венесуэлд эсэргүүцлийн арга хэмжээ дэгдэж, сөрөг хүчнийхэн цагдаа нартай мөргөлдсөн. Өөрийгөө өнгөрөгч нэгдүгээр сард шинэ Ерөнхийлөгч гэж зарласан сөрөг хүчний удирдагч Хуан Гуайдо Николас Мадурог түлхэн унагах ажиллагааны эцсийн шат эхэлснийг зарласан юм. Мөргөлдөөний үеэр 70 гаруй хүн гэмтэж, бэртсэн байна. Мөн нэг хүн амиа алдсан гэж Хуан Гуайдо мэдэгджээ.