Мексикийн өмнөд хэсгийн Чьяпас мужийн Альдама хотын захиргааны тэргүүн Игнасио Перес Хирон үл мэдэгдэх гэмт хэрэгтнүүдийн золиос болжээ. Тавдугаар сарын 4-нөөс хойш ор сураггүй болсонд тооцогдож байсан улстөрчийн цогцсыг даваа гарагт олсон тухай “Эм-Ви-Эс Нотикас” радио станц мэдээлсэн байна.

Одоогоор энэ мэдээллийг төр засгаас албан ёсоор батлаагүй байна. Хироныг хөнөөсөн байж болох шалтгаан нь ч тодорхойгүй байгаа юм. Мексик улсад сүүлийн хэдэн жилд хүчирхийлэл эрс нэмэгдсэн.

Өнгөрсөн онд л гэхэд 33.3 мянга гаруй хүн бусдын гарт амь насаа алдсан гэх дүн мэдээ бий. Харин энэ онд байдал улам муудах төлөвтэй байна. Албан ёсны дүнгээс үзэхэд, энэ оны 1-3 дугаар сарын хугацаанд 8730 гаруй хүн гэмт хэрэгтнүүдийн золиос болсон нь 2018 оны мөн үеийн үзүүлэлтээс есөн хувиар өссөн дүн аж. 

Өнгөрсөн дөрөвдүгээр сарын эхээр Мексикийн Ерөнхийлөгч Андрес Мануэль Лопес Обрадор гэмт хэрэгтэй тэмцэхэд хүндрэл гарч байна гээд улс орныхоо аюулгүй байдлыг нэмэгдүүлэхийн тулд төлөвлөснөөс ч их хугацаа зарцуулагдана гэжээ.