Эрхэм уншигч та бүхэнд Монголын үндэсний олон нийтийн телевизээр гарч буй “Хамгийн азтай үе” телевизийн 16 ангит кинотой холбоотой 9 баримтыг хүргэж байна.

МҮОНТ-ийн найруулагч, “Хамгийн азтай үе” киноны ерөнхий найруулагч Насанбатын Байгал 2007 онд МҮОНРТ-ийн “Сарны нулимс” анхны олон ангит киног найруулсан. Тэрбээр мөн “Амьдрал чиний төлөө”, “Бүсгүйчүүд хайрыг хүснэ” телевизийн олон ангит киноны ерөнхий найруулагчаар ажилласан билээ.

Хамгийн азтай үе” киноны зохиолыг Ц.Эрдэнэбилэг, Ч.Хашчулуун, Х.Өнөрцэцэг, Ж.Намуун нарын дөрвөн уран бүтээлч хамтран бичсэн.

UBS телевизийн нэвтрүүлэгч Э.Уянга найруулагч Н.Байгалын том охин. Э.Уянга МҮОНРТ-ийн “Хэцүү анги” олон ангит кинонд Сувдаагийн дүрийг бүтээсэн.

Болдын дүрийг бүтээсэн дуучин, модел Г.Маргад амьд хөгжмийн “Domantes” хамтлагийн гишүүн. Тэрбээр хамтлагийнхаа Э.Сэргэлэнтэй хамтарч саяхан “Puzzle” нэртэй дуу гаргасан.

Гол дүр Азтайзаяад тоглосон Б.Ану-Үжин Испанийн Барселон хотын Театр урлагийн их сургуульд жүжигчний мэргэжлээр сурдаг. Тэрбээр өмнө нь “Хамгийн хөөрхөн охин” киноны гол дүрд тоглосон. “Хамгийн азтай үе” кинонд Хулангийн дүрийг бүтээсэн жүжигчин Б.Азжаргал Б.Ану-Үжинтэй хамт “Хамгийн хөөрхөн охин” кинонд тогложээ.

“Хамгийн азтай үе” киноны Болд, Билгүүн, Тэмка гурав амьдрал дээр ч сайн найзууд. Тухайлбал, дээрх дүрийг бүтээсэн Г.Маргад О.Самданпүрэв, С.Гэндэнжамц нар оюутан ахуй цагаасаа найзалжээ.

Билгүүний дүрд тоглосон О.Самданпүрэв, “Ахлах сургууль” бүтээлд гол “Байрны ах” кинонд туслах дүр бүтээж байсан.

Ирмүүний дүрд тоглосон Т.Бишрэлт төрийн шагналт, найруулагч Н.Наранбаатарын шавь.

Тагтаа, Сэрээд тоглосон “Мааз” хамтлагийн гишүүн, жүжигчин Р.Сүхболд, И.Төмөрхуяг нар арван жилийн өмнө МҮОНТ-ээр гарч байсан “Хэцүү анги” телевизийн олон ангид тоглосон. Тэд тухайн үеэс урлагт дурлаж, СУИС-ийн жүжигчний ангид сурчээ. Мөн киноны дууг “Мааз” хамтлагийн гишүүн У.Минжин дуулсан.