Шууд Chart

Монгол, Хятадын эрдэс баялаг, эрчим хүч, дэд бүтцийн хамтын ажиллагааны зөвлөлийн хуралдаан болов

2021-10-15 17:43:09

Монгол, Хятадын эрдэс баялаг, эрчим хүч, дэд бүтцийн хамтын ажиллагааны зөвлөлийн ээлжит 3 дугаар хуралдааныг 2021 оны 10 дугаар сарын 15-ны өдөр цахим хэлбэрээр зохион байгуулав.

Зөвлөлийн хуралдаанд Монголын төлөөлөгчдийг Уул уурхай, хүнд үйлдвэрийн сайд Г.Ёндон, Хятадын төлөөлөгчдийг БНХАУ-ын Хөгжил, шинэчлэлийн хорооны дэд дарга Нин Жижэ даргалж, хоёр улсын холбогдох байгууллагын төлөөлөгчид оролцов.

Хуралдааны үеэр талууд эрдэс баялаг, эрчим хүч, дэд бүтцийн салбарт хамтран хэрэгжүүлэх сонирхолтой байгаа шинэ төслүүдийн талаар танилцуулж, хоёр талын хооронд ярилцаж ирсэн зарим томоохон төслийн хэрэгжилтийг идэвхжүүлэх талаар ярилцав.  Тухайлбал, манай улсын өмнөд бүс нутгийн нар, салхины эрчим хүчний нөөцийг ашиглан сэргээгдэх эрчим хүч үйлдвэрлэж, экспортлох цогцолбор байгуулах, Улаанбаатар хотод тойрог хурдны авто зам, баганан тулгуурт хөнгөн галт тэрэг шугам барих болон Багануурын дулааны цахилгаан станцын хүчин чадлыг бүрэн ашиглахад шаардлагатай агаарын шугам, дэд станц барих төслүүдийг хятадын талтай хамтран хэрэгжүүлэх сонирхолтой байгаагаа илэрхийлэв.

Хятадын аж ахуйн нэгжүүд манай улсад хэрэгжүүлж буй эрдэс баялаг, эрчим хүч, дэд бүтцийн салбарын төслүүдэд олон улсын нээлттэй тендерт оролцох байдлаар хамтран ажиллах боломжтойг Г.Ёндон сайд тэмдэглэв.

Монголын тал түүнчлэн аж ахуйн нэгжүүд нүүрсний худалдааны урт хугацааны гэрээ байгуулахад дэмжлэг үзүүлэх, Гашуунсухайт, Шивээхүрэн боомтоор чингэлгээр нүүрс тээвэрлэхийг нэмэгдүүлэх,  Гашуунсухайт, Бичигт, Ханги, Шивээхүрэн чиглэлээр хоёр улсын хооронд төмөр замаар харилцан холбогдох ажлыг эрчимжүүлэх саналтай байгааг Г.Ёндон сайд илэрхийлэв.

Хоёр улсын төр, засгийн тэргүүн нарын түвшинд хүрсэн тохиролцооны хүрээнд нүүрсний худалдааны хэмжээг нэмэгдүүлэх, тээвэрлэлтийг шуурхай зохион байгуулах, боомтын нэвтрүүлэлтийг сайжруулахад анхаарч, холбогдох арга хэмжээг  авч буйг хятадын талаас илэрхийлэв.

Гашуунсухайт-Ганцмод боомтын төмөр замын улсын хил огтлолцлын цэгийг хоёр улсын холбогдох аж ахуйн нэгжүүд тохиролцсонд баяртай байгаагаа талууд илэрхийлж, уг тохиролцоог ГХЯ-дын шугамаар шуурхай баталгаажуулж, төмөр замыг холбох дэд бүтцийн байгууламжийг барихад идэвхтэй хамтран ажиллах нь чухал болохыг тэмдэглэв.

“Монгол, Орос, Хятадын эдийн засгийн коридор байгуулах хөтөлбөр”-т тусгагдсан дэд бүтцийн төслүүдийн хэрэгжилтийг урагшлуулахад анхаарч ажиллахаа талууд илэрхийлэв.

Хуралдааны дүнгээр Протокол гаргаж, хэрэгжилтийг нь хэлэлцэх хурлыг хагас жил тутам зохион байгуулж байхаар талууд тохиролцов.


Монгол, Хятадын эрдэс баялаг, эрчим хүч, дэд бүтцийн хамтын ажиллагааны зөвлөлийн хуралдаан болов  
Үзсэн: 762 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй