“Самсунг” компани ухаалаг гар утсыг бүрэн орлохуйц шинэ загварын ухаалаг цаг гаргахаар зэхэж байна. Энэ цагны тусламжтайгаар утасны дуудлага хийж болохоос гадна гэрэл зураг авч, GPS ашиглах, бас судасны цохилтыг тодорхойлох боломжтой байх гэнэ. “Самсунг” өөрийн “Тизен” үйлдлийн системийг ашиглаж энэ цагаа бүтээж байгаа бөгөөд нэг симкарттай байхаар тооцжээ. Уг төхөөрөмж энэ оны зургаа юм уу, долоодугаар сард гарах бололтой. Энд сануулахад, “ухаалаг” цагны “Samsung Galaxy Gear” нэртэй өмнөх загвар нь эзнийхээ гар утсанд нь ирж байгаа мэдээллийг бугуйнаас нь мэдэгдэх зэргээр ухаалаг гар утастай уялдаа холбоотой ажиллаж чаддаг байсан юм. Гэвч өндөр үнэ, бие дааж ажиллах горимд байх хугацаа богинотойн улмаас амжилт олж чадаагүй юм. Харин одоо гарах шинэ цаг нь дуу хоолойгоор удирдагддаг байх уу, аль эсвэл цагаа чихэндээ нааж утсаар ярьдаг байх уу гэх мэт зүйлс нь одоогоор тодорхойгүй байгаа юм байна.

Орчуулагч, редактор Л.Пүрэвдолгор