МҮОНТ-ийн “Монгол түмний мэнд” нэвтрүүлгийн Булган аймгийн дугаарт Монгол Улсын баатар, ЗХУ-ын баатар, хошууч генерал, Чингис хаан, Александр Невскийн одонт, сансрын нисгэгч Ж.Гүррагчааг гол ширээнд бус арын эгнээд суулгалаа гэдэг шүүмж цахим сүлжээнд өрнөсөн. Энэ талаар МҮОНТ-ийн Нийгмийн нэвтрүүлгийн редакцын продюсер, “Монгол түмний мэнд” нэвтрүүлгийн ерөнхий редактор Ч.Өлзийсайханаас тодрууллаа.

-Монгол түмний мэнд” нэвтрүүлгийн Булган аймгийн дугаарт Ж.Гүррагчаа баатрыг арын эгнээнд суулгалаа гэсэн шүүмж сошиал сүлжээнд өрнөлөө. Та “Монгол түмний мэнд” нэвтрүүлгийн ерөнхий редакторын хувьд тайлбар өгөөч?

-Ж.Гүррагчаа баатрын хувьд жил бүр манай нэвтрүүлэгт зочноор оролцдог. Бид гол ширээндээ суулгаж, ярилцлага авдаг уламжлал тогтсон гэж хэлж болно. Харин энэ жилийн хувьд Ж.Гүррагчаа баатар өөрөө суудлаа сонгож суусан. Бид эхний эгнээний идээ шүүстэй ширээнд түүнийг суулгахаар төлөвлөсөн байсан. Гэтэл баатар “Ах нь энд сууя. Зүгээр хүүхдүүдээ, энэ нь аятайхан юм байна” гээд арын эгнээнд суусан. Нэвтрүүлгийн баг, УИХ-ын гишүүд, аймгийн удирдлагууд Ж.Гүррагчаа баатрыг урд эгнээнд суухыг урьсан боловч хүлээж аваагүй.

-“Монгол түмний мэнд” нэвтрүүлэгт аль салбарын хэчнээн зочин оролцдог вэ?

-МҮОНТ-ийн хувьд хуулиар хүлээсэн үүрэг хариуцлагын хүрээнд бүх аймагт ижил цаг гаргаж өгсөн. Хэн нэгнийг гадуурхаж, нэг аймаг, нэг гишүүнд илүү цаг гаргаж, үйлчлээгүй гэдгийг ташрамд хэлэх байна.

“Монгол түмний мэнд” нэвтрүүлэг 5 дахь жилээ үзэгчдэд хүрч байна. Бид 21 аймгийн ЗДТГ, Улаанбаатар хот дахь нутгийн зөвлөлтэй хамтран нэвтрүүлгээ бэлтгэдэг. Нэвтрүүлэгт зочноор аймгийн удирдлагууд, тухайн тойргоос сонгогдсон УИХ-ын гишүүд, төр нийгэм, урлаг соёлын алдартнууд оролцдог. Урьд нь энэ нэвтрүүлэгт 50-60 хүн зочноор оролцдог байсан бол энэ жил коронавирус өвчнөөс урьдчилан сэргийлж, зочдын тоог 20-иос хэтрүүлээгүй.